സ്നേഹ തീരം

കുഞ്ഞാട്‌

2011-09-05T16:13:00.002+05:30

തോമാച്ചന്റെ
പൂച്ചകള്‍ യജമാനന്റെ കാലുരുമ്മി
കിടക്കയില്‍ മൂത്രം വീഴ്ത്തി
വിറകുപുരയുടെ മുകളില്‍
പെറ്റു കൂട്ടി
ടിയാന്റെ പിന്‍ കാല്‍ മര്‍ദ്ദനങ്ങളെ
ഇരന്നു വാങ്ങി
ജാഗരൂകരായി എലികള്‍ക്കു വേണ്ടി
തിരഞ്ഞുകൊണ്ടേയിരുന്നു
തോമ്മാച്ചന്റെ കുഞ്ഞാട്-പക്ഷെ
പത്തുകല്‍പ്പനകളും
പാടേ ലംഘിച്ച്‌
വേലിക്കെട്ടുകള്‍ക്കിടയിലൂടെ
ഏദന്‍ തോട്ടങ്ങളില്‍
വലിഞ്ഞു കയറി
വിലക്കപ്പെട്ട കനികള്‍
മാത്രം ഭക്ഷിച്ചു
ദിശ തെറ്റിയ പക്ഷിയെ പോലെ
നരകങ്ങളിലൂടെ
തെണ്ടി തിന്നു
തോമാച്ചനറിയാതെ
ബീവാത്തൂന്റെ ചട്ടുകാലന്‍
മുട്ടനാടിനെ പ്രാപിച്ചു
അജപാലകന്റെ
കുഴലൂത്തില്‍ ആട്ടിന്‍ പറ്റങ്ങള്‍ മയങ്ങുമ്പോള്‍
അവള്‍ ചുവന്ന സൂര്യനെ
കണ്ണില്‍ നിറച്ച്‌
തണുത്ത പുലരികളെ
സ്വപ്നം കണ്ടു
അങ്ങനെയിരിക്കെ
ആടങ്ങു ചത്തു
തോമാച്ചന്‍ കൊന്തയും കുരിശും
കുഴിമാടത്തിനു മുകളില്‍ നാട്ടി
തെമ്മാടിക്കും പറുദീസ പ്രപ്തമാക്കണേ
എന്നു ഉള്ളുലഞ്ഞു പ്രാര്‍ത്ഥിച്ചു
ചുണ്ടു കോട്ടി ഒരു ചിരി ചിരിച്ച്‌
ആട്ടിന്‍പ്റ്റത്തെ തെളിച്ചു
വീട്ടിലേക്കു മടങ്ങി
തട്ടിന്‍പുറത്തപ്പോള്‍
പൂച്ചയും എലിയും
പഴയ നാടകം കളിക്കുകയായിരുന്

ബലൂണുകളുടെ നൃത്തം

2008-09-03T18:35:00.007+05:30

കാലത്തിനു കുറുകെയുള്ള ഒറ്റയടിപ്പാതയിലൂടെ മറവിയുടെ പച്ചപ്പൂപ്പലുകള്‍ നാലുപാടും തെറിപ്പിച്ചു കൊണ്ട്‌ ഒരു തൊണ്ട്‌ അതിവേഗം ചലിച്ചു.അത്ഭുതകരമായ കൈ മെയ് വഴക്കത്തില്‍ കാട്ടപ്പക്കമ്പിന്റെ അറ്റത്ത്‌ അതു കുരുങ്ങിക്കിടന്നു.
മാന്ത്രിക ദണ്ഡിന്റെ മറ്റേയറ്റം കണാരുവിന്റെ കയ്യില്‍ ഭദ്രമായിരുന്നു.തൊണ്ടുരുണ്ടു നീങ്ങുന്നത് ടീച്ചറമ്മയുടെ വീട്ടിലേക്കാണ്. അവിടെ ഓനെക്കാത്ത് ടീച്ചറമ്മയുടെ തലതെറിച്ച സന്താനമിരിപ്പുണ്ടായിരുന്നു.കണാരുവും തൊണ്ടും ഉമ്മറത്ത്‌ കിതച്ചു നിന്നു.ഓന്റെ കുപ്പായം ചേറും തഴമ്പും പിടിച്ചതും പിന്‍ഭാഗം മണ്ണിലുരഞ്ഞു കീറിയതുമായിരുന്നു. ഉണക്കമീനിന്റെയും ചുട്ട അണ്ടിയുടെയും ഇണങ്ങാത്ത ഗന്ധങ്ങള്‍ അവനെ ചൂഴ്ന്നു നിന്നു.
കണാരു നടുത്തളത്തിലേക്കൊന്നു പാളി നോക്കി;ഇല്ല ആളനക്കമില്ല. ആരൂല്ലെ ഇബിടെ?ഓന്റെ മഞ്ഞക്കണ്ണുകള്‍ തിളങ്ങി!...
ഇല്ല ന്തേയ്?
വിശാസം വരാത്ത മട്ടില്‍ ഓന്‍ ചാഞ്ഞും ചെരിഞ്ഞും നോക്കി,ടീച്ചറമ്മ ണ്ടോ ഞ്ഞി സത്യം പറ ചങ്ങായീ?കോട്ടേലെ പാമ്പാണെ ഇല്ല പോരെ......
കണാരു ചിരിച്ചു, നനഞ്ഞ ചിരി......ഇബിടെന്തെങ്കിലും തിന്നാനുണ്ടോ? ചോറു ബെയ്ച്ചിട്ടു രണ്ടീസായി.പിന്നിലേക്കു കൂര്‍ത്ത ഓന്റെ ചെവി എന്റെ വായിലേക്കു നീണ്ടു, അതില്‍ ആകാംഷയും വിശപ്പും പുരണ്ടിരുന്നു. ടീച്ചറമ്മേടെ മോന്റെ മനസ്സലിഞ്ഞു,പഴയ അമൂല്‍ ടിന്നിലെ അണ്ണാച്ചി മിച്ചറിനു മുന്നില്‍ കണാരു ബകനായി.ഡാ ഞ്ഞി മുഴുവന്‍ വെട്ടിവിഴുങ്ങല്ലെ അമ്മ പൊറം ചെണ്ടയാക്കും,എന്റെ കണ്ണുകളിലെ ദയനീയത കണാരു തിരിച്ചറിഞ്ഞില്ല.ഞ്ഞി പോഡാ! ടീച്ചറമ്മ പാവം... ഓറ് ന്റെയും അമ്മയാ..അവസാനത്തെ വാക്കിനൊപ്പം മിച്ചറിന്റെ മൂന്നാലു കോലുകള്‍ എന്റെ മൊകത്തേക്കു തെറിച്ചു.

ഓന്റെ തമാശകേട്ടു ഞാന്‍ ചിരിച്ചു.പാവം!...” ഒതിയാര്‍ക്കമില്ലാത്ത വെടക്കുചെക്കനുമായുള്ള കച്ചോടം എന്നു നിര്‍ത്തുന്നോ അന്നേ ഇത്തലതെറിച്ചോന്‍ നേരേയാവൂന്ന് “ഇന്നു രാവിലെയും ടീച്ചറമ്മ പ്രാകിയതു കണാരു കേട്ടിട്ടില്ലല്ലോ!!
പല്ലിനുമുകളില്‍ പറ്റിയ മിച്ചറിന്റെ പരലുകള്‍ നാക്കു കൊണ്ടു തുഴഞ്ഞെടുത്ത് കണാരു എന്റടുത്തേക്കു നീങ്ങിയിരുന്നു,ഒരുകൂട്ടം കാണിച്ചു തരട്ടെ?ന്റെ കയ്യില്‍ പൊട്ടാത്ത ബലൂണുണ്ട്,ത്ര വീറ്പ്പിച്ചാലും പൊട്ടൂല. പോടാ ബഡായി,സൊള്ള്‌,ന്നെ പറ്റിക്കാനല്ലെ?ന്നാഞ്ഞി കണ്ടോ, ഓന്റെ മൊകത്ത് ഗൌരവംകണാരു തികഞ്ഞ ശ്രദ്ധയോടെ ബലൂണ്‍ ചുണ്ടില്‍ ചേര്‍ത്തു,ബലൂണ്‍ വീര്‍ക്കാന്‍ തുടങ്ങി,ഉണ്ണിമാങ്ങ,തൊണ്ടന്‍ മാങ്ങ,ഉണ്ടച്ചക്ക,വരിക്കച്ചക്ക,അതിന്റെ ആകൃതി അനുനിമിഷം മാറുകയാണ്.
മതി കണാരു അതിപ്പം പൊട്ടും,ഇനിക്ക് ഇനിക്കു പേടീയാവുന്നു ........
ഓന്‍ നിര്‍ത്തുന്നില്ല ബലൂണിന്റെ ഓരോ തന്മാത്രയും ഇലാസ്തികതയുടെ പരമ്യത്തിലേക്കു കുതിക്കുകയാണ്.ന്റെ കണ്ണുകളും.ഓന് ശ്വാസം മുട്ടുന്നുണ്ട്‌,ചാലിട്ട മൂക്കള ബലൂണിലൂടെ ഒഴുകി നിലത്തു വീണു പടര്‍ന്നു.
ടീച്ചറമ്മേടെ തലതെറിച്ച മോന്‍ ഉറക്കെ നെലവിളിച്ചു...ഡാ പന്നീ‍ നിര്‍ത്ത്... കാറ്റുപോയ ബലൂണ്‍ കാണാരൂന്റെ കയ്യില്‍ ചുരുണ്ടു കിടന്നു,ഓനൊരു ദീര്‍ഘനിശ്വാസം വിട്ടു എന്നെ നോക്കി..
ഓന്റെ മഞ്ഞക്കണ്ണുകളില്‍ വിജയത്തിന്റെ മിന്നല്‍ കതിരുകള്‍ തെളിഞ്ഞു.
ഏട്ന്നാ മോനേ ഞ്ഞി ഇബ്ബലൂണ് വാങ്ങീത്‌? മോയിക്കാന്റെ പീട്യേന്നാ?ന്റെ വാക്കുകളില്‍ അത്ഭുതവും ഭീതിയും കലര്‍ന്നിരുന്നു.
കണാരു ചിരിച്ചു, പൊട്ടിപ്പൊട്ടിച്ചിരിച്ചു,മൂക്കോണ്ടാ ഓന്‍ ചിരിക്യാ ചിരിക്കൊപ്പം പത്തിവിടര്‍ത്താത്ത രണ്ടു പാമ്പിന്‍ കുഞ്ഞുങ്ങള്‍ മൂക്കിന്‍ തുളയില്‍ നിന്നു പുറത്തു ചാടും ചിരിക്കൊടുവില്‍ അവ മാളങ്ങളില്‍ വിശ്രമിക്കും.
ബടുക്കൂസെ ഇബ്ബലൂണ് മോയിക്കാന്റെ പീട്യേലൊന്നും കിട്ടൂല,ഞ്ഞി തലകുത്തി നിന്നാലും കിട്ടൂല.
കള്ളപ്പന്നി ബീര്യം കൂട്ട്വാണ്.
ഞ്ഞി പൊന്തി കാട്ടണ്ടാ ഞ്ഞിട്ടു പറയ്യെം വേണ്ട. ഞാന്‍ കെറുവിച്ചു.അതോനു സഹിക്കൂല,ഓന്റെ കണ്ണിലെ തിരി കെട്ടു.
ഒണക്കമത്തീന്റെ വാടയ്ക്കൊപ്പം ആ രഹസ്യം എന്റെ കാതിലെത്തി
ഇനിക്കിത് അണ്ടീക്കണ്ണച്ചന്റെ വൃത്തിക്കമാവിന്റെ ചോട്ടീന്നു കിട്ടീതാ,മാപ്ലാര് സുന്നത്തു കയ്ച്ചാലിടുന്നതാണു പോലും,കുട്ട്യോക്കറു പറഞ്ഞതാ!അനക്കു ബേണോ? കൊറേയുണ്ട്.ഒറ്റശ്വാസത്തില്‍ എല്ലാം പറഞ്ഞു കണാരു കിതച്ചു.
നിധിവേട്ടയ്ക്കിറങ്ങിയ കടല്‍ക്കൊള്ളക്കാരെപ്പോലെ രണ്ടു കുട്ടിച്ചെകുത്താന്മാര്‍ അണ്ടിക്കണ്ണച്ചന്റെ വൃത്തിക്കമാവിന്‍ തോട്ടം അരിച്ചു പെറുക്കി,ടീച്ചറമ്മയുടെ വീടിന്റെ എറയില്‍ പകലു മുഴുവന്‍ ബലൂണുകള്‍ നൃത്തം ചെയ്തു.രാത്രി വള്ളിത്തണ്ടുകള്‍ ചിതറിക്കിടന്ന തറയില്‍ തിണര്‍ത്ത തുടയുമായി ടീച്ചറമ്മേന്റെ തലതെറിച്ച സന്തതി കിടന്നു.നിശീഥിനിയുടെ ഏഴാം യാമത്തില്‍ മോന്തായത്തിലൂടെ പല്ലികള്‍ വെകിളി പിടിച്ചു പാഞ്ഞു.ടീച്ചറമ്മേടെ മോന്‍ പരശതം ബലൂണുകള്‍ക്കൊപ്പം ഉയര്‍ന്നു പൊങ്ങുന്ന കാഴ്ച കണ്ട് അവ നിര്‍ത്താതെ ചിലച്ചു,കണാരുവിന്റെ രൂക്ഷമായ നോട്ടത്തില്‍ പല്ലികള്‍ നിശ്ശബ്ദരായി ...

കയ്യും കാലുമില്ലാത്തത്

2008-08-30T11:03:00.000+05:30

കയ്യും കാലുമില്ലാത്തതാണേ
കണ്ണു മൂക്കുമില്ലാത്തതാണേ...
അമര്‍ത്തിയമര്‍ത്തി ഞെരുക്കി -
ഞെരുക്കി-യൊടുവില്‍
സ്വയംഭൂവാര്‍ന്നൊരു വക്രോക്തിയാണേ..
വഴികള്‍ തീരുന്നിടത്തൊരു
നാദതന്തുവായാരവ-
ങ്ങളിലലിഞ്ഞടങ്ങുന്നതിന്റെ-
യാരംഭം ഹംസധ്വനിയിലും
മംഗളം തോടിയിലുമാണേ ...
ജ്ഞാനനിര്‍മ്മിതിക്കിടയില്‍
കുഞ്ഞുങ്ങളും
കണ്ണടച്ചു ധ്യാനിക്കുമ്പോള്‍
യോഗികളും
മുട്ടുകുത്തി പ്രാര്‍ത്ഥികുമ്പോള്‍
ഭോഗികളും
മര്‍ദ്ദിതരെയും പീഡിതരെയും
ഉദ്ധരിക്കുമ്പോള്‍
സചിവശ്രേഷ്ഠരും
അതുകാരണം
നിശ്ശബ്ദതയെ ഭയപ്പെടുന്നുണ്ടേ..
ഇട്ടവനാദ്യം മൂക്കു പൊത്തും,
പഴുപ്പിച്ച കണ്മുനകൊണ്ട-
ടുത്തുള്ളവനെ പൊള്ളിക്കും
ഇന്നാള്
ഏതോ കഠിന പദം
ഊന്നിപ്പറഞ്ഞപ്പോളാണതു
ജനിച്ചത്
സെസ് സ് സ് സ് സ് സ് സ്
ങ്ങറ ങ്ങറ ങ്ങറ ങ്ങറ ങ്ങറ...
പ്ല പ്ല പ്ല പ്ല പ്ല പ്ല പ്ല പ്ല....
താളത്തിലാണ് പുറത്തു വന്നത്.
ക്ഷമിക്കണം
വസന്തത്തിന്റെ
ഇടിമുഴങ്ങിയിട്ടും
എലിപ്പെട്ടിയിലൊരു
ദിനോസറിന്റെ മുട്ട
പുഴുത്തു നാറുന്നു
ചുറ്റും ഇയ്യലുകളുടെ ശവങ്ങള്‍

തുലയട്ടെ......

2008-07-23T22:57:00.000+05:30

കൊറ്റിയും പശുവും,*

ഇരുമ്പു മുനകളുടെ ചുംബനത്തെ പറ്റി...

കടല്‍പ്പൂവും സന്യാസി ഞെണ്ടും,*

അധികാരത്തിന്റെ ദ്വാരങ്ങളെപറ്റി...

ചിതലും ട്രൈക്കോനിംഫയും,*

അടിമത്തൊഴുത്തുകളെപ്പറ്റി...

കടല്‍ മുള്ളന്‍,*

യാഗമൃഗത്തെപ്പറ്റി....

അസുന്ദരവും പരുക്കനുമായ

അലര്‍ച്ചകള്‍

അനന്തരം

നക്രത്തിന്റെ

പിളര്‍ന്ന വായിലേക്ക്,

അടിഞ്ഞുകൂടിയ ഇരുട്ടിലേക്ക്,

ഏതു വിശ്വാസത്തിന്റെ

വാള്‍ത്തലപ്പിലൂടാണ്?

ഒരു പ്ലോവര്‍* പക്ഷി

ചിറകു വിരുത്തിപ്പറക്കുന്നത്?

എന്താണാ ശബ്ദം?

കൂരിരുട്ടിന്റെ

കാടിളക്കപ്പെടുകയാണോ?

അല്ല.....

ആരോ വേട്ടയാടപ്പെടുക മാത്രം...

*1-രണ്ടു ജീവികള്‍ തമ്മിലുള്ള ബന്ധത്തില്‍ രണ്ടു പങ്കാളിക്കും ഗുണം

ലഭിക്കുന്ന വിധമുള്ള ആഹാര ബന്ധം

*2 -പ്ലോവര്‍ പക്ഷി മുതലയുടെ വായില്‍ കടന്ന് പല്ലുകള്‍ക്കിടയിലെ അവശിഷ്ടങ്ങള്‍

ആഹാരമാക്കുന്നു,മുതലയ്ക്കു പല്ലു വൃത്തിയാകുന്നു

ദൈവമേ എല്ലാം നിനക്കു വേണ്ടി

2008-07-21T23:24:00.000+05:30

ഒന്നാമത്തെ ഓര്‍മ്മയില്‍......

തുറിച്ചു മലര്‍ന്ന കണ്ണുകളും,

ഒടിഞ്ഞ കഴുത്തുമായി-

ചിതറിപ്പോയ

നിഴലുകള്‍ക്കൊപ്പം,

പകയുടെ കഫനൂലുകള്‍

പൊതിഞ്ഞഴുകുന്നൊരു

നക്ഷത്രക്കുഞ്ഞ്...

രണ്ടാമത്തെ ഓര്‍മ്മ..........

കുരിശ് ,ചാട്ടവാര്‍, കല്‍ത്തുറുങ്ക്‌-

കുലശത്രുവിനു നേരെ കുലയ്ക്കുന്ന

ത്രയ്യംബകങ്ങള്‍.....

മൂന്നാമത്തേതും അവസാനത്തേതും...

നക്രാസക്തികളിലേക്കൊരു

അറവുമൃഗത്തിന്റെ

തല നീളുന്നു.

ചുവന്നൊരു ശവപ്പെട്ടി,

മുണ്ഡനം ചെയ്ത മനസ്സുമായ്

പെണ്ണൊരുത്തി.....

ആള്‍ക്കൂട്ടം

ഊഷ്മളരാത്രികളിലേക്ക്,

വിജയത്തിലേക്ക്,

വിശ്രാന്തിയിലേക്ക്...

നാവുകള്‍,

അശ്ലീലമായൊരു

മൌനത്തിലേക്ക്...

ദൈവമേ

എല്ലാം നിനക്കു വേണ്ടി

ആയിരുന്നു....

ചൂല്‍!!!!!!!!

2008-06-05T15:03:00.000+05:30

ഒരു ചൂല് നിത്യവും നവീകരിക്കപ്പെടുന്നുണ്ടെന്ന്
ന്യായമായും സംശയിക്കാം
തേഞ്ഞു തീരലില്‍,മിനുസപ്പെടലില്‍, അതിന്റെ
പുറം തൊലികളടര്‍ന്നു മാറുമ്പോള്‍
ഒരോ ദിനവും അതു നഗ്നമാക്കപ്പെടുകയാണ്
നാലു ചുവരുകളുടെ ആജ്ഞകളില്‍ നിന്ന്...

ഊരോ ഈര്‍ക്കിലും പ്രതീക്ഷിക്കുന്നത്
കെട്ടുകള്‍ പൊട്ടുമെന്നു തന്നെയാണ്

കുറ്റിച്ചൂല്‍ പവിത്രീകരിക്കപ്പെട്ട
കുതറലുകളുടെ ക്രിയാ രൂപമാണ്

ഒടുവിലൊടുവില്‍
ഇറയില്‍ കെട്ടിയ ഊഞ്ഞാലുകളില്‍
ചിതലരിക്കുമ്പോള്‍
ഗോത്രവേരുകള്‍ പിണഞ്ഞ
പഴയ പത്രങ്ങള്‍ക്കും
കുപ്പിച്ചില്ലുകള്‍ക്കുമൊപ്പം
അനിവാര്യമായ മോക്ഷം കാത്ത്
വികൃതമായൊരു കവിതയുടെ
ഞരക്കം മാത്രം

പട്ടിപര്‍വ്വം

2008-05-17T10:44:00.000+05:30

പണ്ടു പണ്ടു പണ്ട്
ഒരിക്കലൊരിടത്തൊരു നായ....
ഒടലിനേക്കാളും ബല്യ തലയുള്ളോന്‍.
കുറ്റിയും, കൊളുത്തും,
തുകലും ,ചങ്ങലേം,
പിഞ്ഞിയും ദ്രവിച്ചും പോയ
പട്ടിണിയുടെ എല്ലിന്‍ കൂട്.

മാന്തി മാന്തി പൊടിയായ വരണ്ട മണ്ണില്‍,
നീട്ടിയ മുന്‍ കാലുകളില്‍ മുഖം പൂഴ്ത്തി-
തീയിലൂടെ നടന്നതും, കണ്ണിലുഷ്ണം പുകഞ്ഞതും-
വായുവിനെ കുത്തിത്തുളയ്ക്കുന്ന ചീവീടുകള്‍
കൂര്‍ത്തനോട്ടത്തില്‍ നിശ്ശബ്ദമായതും .
അവനെപ്പോഴും
അയവെട്ടിക്കൊണ്ടിരിക്കും.
ഇത്തരം ക്ലീഷേകള്‍ മടുത്തതു കൊണ്ടാവാം
കാക്കകള്‍ അവന്റെ ചെവിപ്പഴുപ്പിനെ
മറന്നു കളഞ്ഞത്

തെക്കേലെ പിള്ളാര് കല്ലെറിഞ്ഞ്
കാലൊടിച്ചു
ഉശിരും ചൊണയുമുള്ള
കൊടിച്ചി പട്ടികള്‍
കടിച്ചു കുടഞ്ഞു

ഇപ്പോള്‍

വല്ലപ്പോഴുമൊരു മുരള്‍ച്ച.
ചോരയൂറ്റുന്ന ചെള്ളുകളെ തെറിപ്പിക്കാന്‍,
ദുര്‍ബലമായ ചില അനക്കങ്ങള്‍.
ജീവന്റെ അടയാളങ്ങള്‍ മാത്രം.

കാലം പിന്നെയും മുന്നോട്ട്,
അങ്ങനെയിരിക്കെ....
നാടറിഞ്ഞൊരു കല്യാണം.

ആര്‍ത്തി മൂത്തു പ്രാന്തായ നായ
കൊതി നിറച്ച കണ്ണുകളുമായി
ഏന്തി വലിഞ്ഞു നടന്നു....

പുളിയന്മാവിന്റെ ചോട്ടിലൊരു
തീറ്റ മത്സരം
വറുതി വെന്ത കലത്തിലേക്കു
വെന്തു മലര്‍ന്ന മാന്മാര്‍ക്കു കയ്മയും*
മൊരിഞ്ഞു കരിഞ്ഞ ബ്രോയിലര്‍
ചിക്കനും ഇടതടവില്ലാതെ......
ശ്വാസം വിട്ടില്ല, തിരിഞ്ഞില്ല
മറിഞ്ഞില്ല...........

തിന്നുതിന്നുതിന്നൊടുവില്‍............

വിശപ്പ് അവന്‍ അതിജീവിച്ചിരുന്നു........

* ബിരിയാണിയുടെ അരി

അച്യുതന്‍ ഗാന്ധി

2008-03-21T20:11:00.000+05:30

ഇവനച്യുതന്‍ ഗാന്ധി,

മാര്‍ട്ടിനച്യുതന്‍ കിംഗ്,

ഫാദറച്യുതന്‍ ഡാമിയന്‍,

വടക്കോട്ടു തലവച്ചു വെടക്കായവന്‍.

ഞാനുണ്ടതിനാല്‍ നീയും-

നീയുണ്ടതിനാല്‍ ഞാനുമെന്നോതി,

ഇടത്തോട്ടും വലത്തോട്ടും ചെരിയാതെ

ഒരേതാളത്തില്‍

ഒരേ വേഗത്തില്‍

ചരിക്കുന്നൊരന്യഗ്രഹം.

ആളൊരു പോയത്തക്കാരന്‍

ഏതു മാളത്തിലും കൈയിടും,

ഒറ്റത്തളയാല്‍ കവുങ്ങും

കരിമ്പനയും താണ്ടും.

കത്തുന്ന പുരയിലെക്കും

കുലം കുത്തുന്ന പുഴയിലെക്കു-

മെടുത്തു ചാടിക്കളയും.

വഴുക്കലില്‍ തെന്നി വീണു ചിരിക്കും,

പകലിലുമിരവിലും,

അടിച്ചാലുമടിച്ചില്ലേലും ഗാന്ധി.

ഇവന്റെ നെഞ്ചില്‍ പറ്റിപ്പി-

ടിച്ചെത്ര കുഞ്ഞു പ്രാണനുകള്‍

മൃത്യുവിന്നിരുള്‍ക്കയങ്ങളില്‍-

മുങ്ങിനിവര്‍ന്നിട്ടുണ്ടെത്ര-

പെണ്ണിന്റെ പേറ്റു നോവറിഞ്ഞതാണി-

ത്തായ്മരത്തിടമ്പു പൊരിയന്‍

എത്ര പേരെച്ചുമന്ന ചക്രമില്ലാ വണ്ടി-

നീ ഫാദറച്യുതന്‍ ഡാമിയന്‍-അഥവാ

പ്രതിഫലം പറ്റാത്ത ടാക്സി.

പ്രാവും പരുന്തും ശിബിയും

പറന്നു പോകുമ്പോള്‍

അവന്റെ വെടിയിറച്ചി,

ചാവും

കോപ്പും*

പതിനാറടിയന്തിരവും

പൊരിച്ചു തിന്നുന്നു.

മാന്തി മാന്തി പുണ്ണാക്കിയ മുള്‍ക്കാടുകളില്‍

കൂര്‍ത്ത മൂക്കുകള്‍

കൊതിയുള്ള നാക്കുകള്‍

കെറുവുള്ള കണ്ണുകള്‍-

എന്തോ തിരയുന്നു...

കുഴിച്ചു കുഴിച്ചു കുഴിച്ചൊ-

ടുവിലൊരു മുടി നാര്

ദ്രവിക്കാത്തൊരെല്ലിന്‍ തുണ്ട്

വറ്റുണങ്ങിയ നിശ്ശബ്ദതയ്ക്കുമേല്‍

തിരിമാലികളുടെ തിറയാട്ടം

കടലു രണ്ടായ് പിരിയുന്നു

നടുവിലൊരു മേശ

മേശയില്‍ കാസ

കാസയില്‍ പുളിച്ച സമവായവീഞ്ഞ്

തുച്ഛാംശുവീതം നക്കീട്ടൊത്താ-

ലൊരൊത്തുതീര്‍പ്പ്.

ഇരുകടലിനുമിടയിലൂടൊരുവന്‍

മാര്‍ട്ടിനച്യുതന്‍ കിംഗ്

ആടിവാങ്ങും തകരച്ചെണ്ട,

ക്ഷണിക്കാത്ത വിരുന്നുകാരന്‍

എന്തിനു വന്നുനീ?

ജ്വലിക്കുന്നു വൈതാളികന്‍!!

“പിള്ളാരു വഴി നീളെ വെളിക്കിരിക്കുന്നു

തീട്ടത്തില്‍ ചവിട്ടിച്ചവിട്ടി കാലറയ്ക്കുന്നു

പൊതുകക്കൂസു വേണമീ നാടിനു-

കഴിയുമെങ്കിലോരോ വീട്ടിലുമോരോന്ന്”

മുഖമടച്ചൊരടി

പിന്നെയൊരാട്ടും പൊലയാട്ടും

പുഴയിലൂടവന്‍ നടന്നു നീങ്ങുന്നു

മണല്‍ത്തരികളില്‍ നിണം പുരളുന്നു.

തീപ്പെട്ടു മണ്മറഞ്ഞു കാലം ചെയ്ത

പുണ്യശരീരങ്ങള്‍ ക്ഷമിക്കുക

അച്യുതന്‍ ഗാന്ധി ചത്തു...

അലര്‍ച്ചകള്‍ കിളിപ്പാട്ടുകളാവില്ലല്ലോ!!!!!

കോപ്പ്- വിവാഹം

പൊറോട്ട

2008-03-15T20:22:00.000+05:30

കുഴയ്ക്കലിനും ഉരുട്ടലിനും
പരത്തലിനുമിടയ്ക്കുള്ള-
എല്ലാ മര്‍ദ്ദനങ്ങളുമേറ്റ് പതം വന്ന്,
അടുക്കളച്ചൂടില്‍ വെന്ത്-
നറുമണമുതിര്‍ക്കുന്ന പൊറോട്ട,
തീന്‍ മേശയിലെ ചെമന്നപൂക്കളുള്ള
വെളുത്ത പിഞ്ഞാണിപ്പാത്രത്തില്‍
മൊരിഞ്ഞു കിടക്കും.

ധാന്യപ്പൊടിയും വെളിച്ചെണ്ണയും എന്റെ,
അടുപ്പിലെ തീയും പത്തിരിച്ചട്ടിയും എന്റെ,
നിന്നെചുട്ടതു ഞാന്‍..........
അതിനാല്‍ നീയെന്റെ ,എന്ന ഭാവത്തില്‍
ഒറ്റക്കീറിനു രണ്ടായ് പകുത്ത് വിഴുങ്ങിക്കളയും നീ

ആളലിനും ആന്തലിനുമിടയില്‍-
ഉമിനീരില്‍ കുതിരാതെ, രുചിമുകുളങ്ങളറിയാതെ-
ആറാറു മടക്കും അറുപതു കുരുക്കുമുള്ള-
ആര്‍ത്തിപിടിച്ച പെരുങ്കുടലിലേക്കത്
വഴുക്കിത്തെറിച്ചൊടുവില്‍
ചിറിതുടച്ച്,ഏമ്പക്കം വിട്ടെഴുന്നേറ്റ്
ചൂടാറാത്ത ഉച്ഛിഷ്ടം,ഫ്രീസറിന്റെ
ശവത്തണുപ്പിലേക്കൊരേറു കൊടുക്കും.

നട്ടുച്ചയ്ക്കും നട്ടപ്പാതിരാക്കും
ഒന്നു ചൂടാക്കി കഴിക്കാലോ!!!
വിശപ്പാണിവിടെ
അഭിനയിക്കുന്നത്

തട്ടുകടയിലെ ചുടുദോശ
എരിഞ്ഞു കത്തുന്ന ചമ്മന്തി,
വായിലിട്ടാല്‍ അലിയുന്ന പാലപ്പം
ആവി പറക്കുന്ന പുട്ടും കടലേം
രുചി കൂടും വെലയും

വെളുത്ത പാഷാണാമോ-മൈദപ്പശയോ
ധാന്യച്ചണ്ടിയോ എന്തുമാവട്ടെ
നെഞ്ഞെരിച്ചലോ വായുകോപമോ
മലബന്ധമോ എന്തും വരട്ടെ
നിനക്കു വിശക്കുമ്പോളൊക്കെ
നീയതിനെ ചൂടു പിടിപ്പിക്കും.....

ചുവരുകള്‍, ചക്കിങ്ങ് (രണ്ടു കവിതകള്‍)

2008-03-09T14:41:00.000+05:30

മുനിസിപ്പാലിറ്റി ബസ്റ്റാന്റിലെ-
മൂത്രപ്പുരയുടെ,
വല്യങ്ങാടിയിലെ-
പച്ചക്കറി മാര്‍ക്കറ്റിന്റെ,
ഡെ എക്സ്പ്രസ്സിലെ-
ടോയ് ലറ്റിന്റെ,
ചുവരുകളും
സദാകുരന്മാരുടെ
നാക്കും തമ്മിലെന്തോ ബന്ധമുണ്ട്.
എന്തു ബന്ധം?
വെറുതെ തോന്നീതാ!!!

ചക്കിംഗ്
ന്താ കുട്ട്യോ അന്റെ പേര്?
അമ്മിണി
ആരാന്റച്ച്ഛന്‍?
മൌനം
അച്ച്ഛ്നില്ലേ?
മൌനം
തള്ളേടെ പേരെന്താ?
നളിനി
ഏതു നളിനി ? വീ‍ട്ടു പേരെന്താടീ?
ഇല്ലിക്കൂട്ടത്തില്‍..
ഓഹോ മ്മളെ നളിനി ജമീലേടെ മോളാ ല്ലേ?

കുണ്ടന്റെ പേരെന്താ?
നിഷാദ്
തന്തേം തള്ളേം വെവരമുള്ളോരുതന്നെ
അന്ന കണ്ടാലൊരു കാട്ടാളന്‍ തന്ന്യാ!!

പ്രകാശിനി എന്ന പവര്‍ക്കട്ടും
ആനപ്പാച്ചന്‍ ശശിയും
റിക്കിപോണ്ടിങ്ങും
കമലാക്ഷി ടീച്ചറുടെ
സ്കൂളില്‍
തന്ന്യാ പഠിച്ചത്......

ആമ്പല്ലൂരിലെ കുളങ്ങള്‍

2008-03-06T22:45:00.000+05:30

ആമ്പല്ലൂരിലെ കുളങ്ങള്‍ക്ക്

രാത്രി വിടരുന്ന പൂക്കളുടെ ഗന്ധമാണ്

ഇരവില്‍ അവയ്ക്കുചുറ്റും നിശാശലഭങ്ങള്‍

നൃത്തം വയ്ക്കുന്നു

കറ്റച്ചൂട്ടുകളും ഞെക്കു വിളക്കുകളും തെളിയുന്ന

നക്ഷ്ത്ര മണ്ഡലത്തിനു താഴെ

അപൂര്‍വ്വ സുഗന്ധം പരത്തുന്ന

അറുപത്തിനാലുതരം ആമ്പല്‍പ്പൂക്കള്‍

വിടരുന്ന മരതകക്കടലുകളാണവ.

ജാതിഭേദം മതദ്വേഷം ഏതുമില്ലാതെ സര്‍വ്വരും

സോദരത്വേന വാഴുന്ന മാതൃകാസ്ഥാനമെന്ന്

സ്നാനഘട്ടത്തിന്റെ വില്ലീസ് പടവുകളിലേക്കു

മുങ്ങാങ്കുഴിയിടുമ്പോള്‍

ജലസ്തംഭത്തിന്റെ നഗ്നമായ

പിന്‍ കഴുത്തില്‍

കവിയും കാമുകനും പച്ചകുത്തുന്നു.

പതിനേഴിന്റെ പടവു കയറുന്ന ഋഷ്യശൃംഗന്‍

കിഴക്കോട്ടും പടിഞ്ഞാട്ടും നീന്തിയും

കുട്ടിക്കരണം മറിഞ്ഞും മതിവരാതെ

വിടരാത്ത അറുപത്തി അഞ്ചാമത്തെ

പൂവിനു വേണ്ടി വാശിപിടിച്ചു ചിണുങ്ങുമ്പോള്‍

ആരോ ചാറ്റിച്ചെരിച്ചെറിഞ്ഞ കല്ല്

ഉപ്പുപരലുകളുറഞ്ഞ

കുളത്തിന്റെ ഇടത്തേ നെഞ്ഞില്‍ പതിക്കുന്നു.

ഗ്രീഷ്മോദയത്തില്‍ കുളം വറ്റി വരളുന്നു

ഹൃദയചുംബനത്തിന്റെ അവസാനത്തെ കവിത

കാമുകന്റെ വിരലില്‍ മുദ്രണം ചെയ്ത്

കുളം മൌനിയാകുന്നു

ഉഷ്ണപ്പുണ്ണു കരളുന്ന പെരുന്തുടകളില്‍

കുയിലിന്റെയും ഭൂട്ടാന്‍ ഡാറ്റായുടേയും

വീര്‍ത്ത ബലൂണുകളുടെയും

ഫോസിലുകള്‍ ചീഞ്ഞളിയുന്നു.

നാട്ടുമാവിന്‍ കൊമ്പില്‍ ഊയലാടുന്ന

വയസ്സറിയിച്ച പെണ്ണിനെ കണ്ണുകൊണ്ടുഴിഞ്ഞ്

ആമ്പല്ലൂരിലെ തലമൂത്ത

കാരണ്വോരു കരിനാക്കു വളച്ചു...

“ഇക്കൊല്ലം മഴ നേരത്തെയായിരിക്കും”

പുതുമഴയില്‍ ആമ്പല്ലൂരില്‍ പുതിയൊരു കുളം

പിറക്കുന്നു

സ്വന്തം കാമുകന് മറ്റൊരുത്തന്റെ ഭാര്യ

2008-02-28T21:50:00.000+05:30

കാമുകാ
ഒട്ടിപ്പു പശകളില്‍ നിന്നു
നെറ്റിയില്‍ ചുട്ടികുത്തിയ
സ്റ്റിക്കറുകളില്‍ നിന്ന്
പനിക്കുന്ന കിടക്കകളില്‍ നിന്ന്
എനിക്കറിയാത്തതൊന്നും
നീയറിയരുതെന്ന
ഫറോവന്റെ കല്പനകളില്‍ നിന്ന്
മോചനം
ഇല്ല
ഞാനൊരു പരോള്‍ പ്രതീക്ഷിക്കുന്നില്ല

അല്ലെങ്കില്‍ തന്നെ
മുറിച്ചുരികയും
മുളയാണിയും
പച്ചോലയും
പൂഴിക്കടകനും
കടന്ന്
ഞാനവിടെ എത്തുമ്പോഴേക്ക്

നിന്റെ തല
ഒരുളുപ്പുമില്ലാതെ
പഴയ ചാര്‍ച്ചക്കാരിക്ക്
ദാനം നല്‍കി കഴിഞ്ഞിരിക്കും
സ്വന്തം ദേവ

ചെറിയ വലിയ കഥ

2008-02-27T22:47:00.000+05:30

നിക്കൊരു കഥ പറഞ്ഞു തര്വൊ?
ഉം
പണ്ട് പണ്ട് പണ്ട്
ഒരിടത്തൊരിടത്തൊരിടത്ത്
ഒരു രാജാവ്
രാജാവിന് നാലു മക്കള്‍
ആദ്യത്തോള്
ക
രണ്ടാമത്തോള്
ഥ
കുഞ്ഞുറങ്ങി പാവം

ചാറ്റ് റൂം
ഹല്ലോ എലീന

ഹായ്
ഇത്തിരി ലേറ്റായി?

സോറി ഡാര്‍ലിംഗ്
മോള്‍ക്കൊരു സ്റ്റോറി..........

അടുക്കളയില്‍
ട്ണേം ട്ണേം ട്ണേം

വാട്സ് ഹാപ്പനിംഗ് ഡീയര്‍?

പേടിച്ചോ?
ഡിന്നെര്‍ സെറ്റിനു കയ്യും കാലും
മുളച്ചതാ!!!!!!
ഹഹഹഹഹഹഹഹഹ

നരകം

2008-02-24T21:18:00.000+05:30

ഒതയോത്തെ സാവിത്രിക്കുട്ടിയെന്ന-
വാരസ്യാരുകുട്ടി
മൂവാണ്ടന്‍ മാവിന്റെ ചാഞ്ഞ കൊമ്പില്‍
തൂങ്ങി നിന്നതിന്റെ പിറ്റേന്ന്
മലയ്ക്കു പോകാന്‍ മാലയിട്ട
പി കെ ഷാജി മാല പൊട്ടിച്ചു തോട്ടിലെറിഞ്ഞു.
പട്ടാപ്പകല്‍ ഓന്റച്ചനും മാളോരും
കാണെ വെള്ളമടിച്ചു.
പകലു സൂര്യനോടും രാത്രി നക്ഷത്രങ്ങളൊടും
അവന്‍ ആണയിട്ടു
എനിക്കു നരകം മതി
എനിക്കു നരകം മതി
എനിക്കു നരകം മതി

കണ്ണടകള്‍

2008-02-21T21:27:00.000+05:30

മൂലക്കുരുവിന്റെ ചോന്ന വട്ടങ്ങള്‍ക്കു മുന്നില്‍-
ദ്രവിച്ച ആണികളില്‍ ഇളകിയാടുന്ന
തഴമ്പു പിടിച്ച മേശയില്‍,
തന്തയില്ലാക്കഴുവേറികളാം
സന്ദേഹികളുടെ തിമിരക്കണ്ണുകള്‍ തണുപ്പിച്ച്
ഉണര്‍വ്വൊരു ബാധ്യതയെന്ന മട്ടില്‍
ഉദാസീനമായ് തല കുമ്പിട്ട് കിടക്കുന്ന
കണ്ണട വെറുമൊരു കണ്ണടയല്ല.

കൂടു വിട്ടു കൂടു മാറുന്ന
മാന്ത്രികന്റെ യോഗദണ്ടു കണക്കെ
അമൂര്‍ത്തമായൊരു കാവ്യ ബിംബം
ബാക്കിയാക്കിയ ദാര്‍ശനിക വ്യഥ കണക്കെ
മുഖമില്ലാത്തൊരു ചിഹ്നം.

ഡേ എക്സ്പ്രസ്സിന്റെ ഇടനാഴിയില്‍
കുത്തി നിര്‍ത്തിയ സൂചികള്‍ക്കിടയില്‍
ചൊറിച്ചു മല്ലലിന്റെ പച്ചച്ചിരികള്‍.

തുറുപ്പുജാക്കിയുണ്ടായിട്ടും
ഏഴാം കൂലിക്കു പിടികൊടുത്ത്
മറ്റൊരു കണ്ണടയുടെ അലര്‍ച്ച

വാല്‍ ക്കഷ്ണം- ഉദ്യോഗസ്ഥര്‍ക്കെന്തിനാ 2 കണ്ണട:)

കെട്ടിയോള്‍

2008-02-17T12:50:00.000+05:30

അരകല്ലിലരഞ്ഞ്
അലക്കു കല്ലില്‍ ചതഞ്ഞ്
കല്ലുരലില്‍ പൊടിഞ്ഞ്
കിണറാഴങ്ങളില്‍
കൈ കഴച്ച്
പച്ച വിറകിനൊപ്പം
പുകഞ്ഞ പുലരികളെ
അവള്‍ വെറുത്തിരുന്നു

വിയര്‍പ്പു തിളപ്പിച്ചൂറ്റിയ
അത്താഴത്തെ
ചെരങ്ങു പിടിച്ച
കുഞ്ഞുങ്ങളെ
ഉറക്കത്തില്‍ കെട്ടിപ്പിടിക്കുന്ന
ഉപ്പു ചുവയുള്ള കെട്ടിയോനെ
അവള്‍ക്കു മടുത്തിരുന്നു.

ന്നിട്ടും

തെക്കേതിലെ സിദ്ധാര്‍ത്ഥന്റെ
ചില്ലരമാരയിലെ
യശോധരയെന്നു പേരുള്ള
സുന്ദരിപ്പാവ
ഗ്യാസുകുറ്റിക്കൊപ്പം
പൊട്ടിത്തെറിച്ചപ്പോള്‍

കെട്ടിയോന്റെ ഏറ്റം മുഷിഞ്ഞ്
തുളവീണ അടിവസ്ത്രത്തിന്
അവള്‍ തിളയ്ക്കുന്നൊ-
രുമ്മ കൊടുത്തു

പ്രണയ പര്‍വ്വങ്ങള്‍

2008-02-13T22:38:00.000+05:30

കുന്നിന്‍ മുകളിലേക്ക്

കല്ലുരുട്ടുന്നവരുടെ അറിവിലേക്ക്?!

ഉറവ വറ്റിപ്പോയ നീര്‍ക്കുഴികളില്‍-

ചിതല്‍ തിന്ന പുറം ചട്ടയുമായി

പ്രണയപ്പെരുക്കങ്ങളുടെ വിസ്തൃത-

മന:പാഠങ്ങള്‍ കണ്ടേക്കാം

കണ്ണുടക്കരുത്.

പുറം കരിഞ്ഞ് അകം വേവാത്ത

നന്നങ്ങാടികളിലെ കറുത്ത-

ഫലിതങ്ങള്‍ വെളുക്കെ ചിരിക്കുമ്പോള്‍

വഴി തെറ്റരുത്

അറ്റം കൂര്‍ത്ത ഇലകളുള്ള

മരക്കൊമ്പുകളില്‍

ചിറകുകള്‍ നഷ്ടപ്പെട്ട

ഇരട്ടത്തലയുള്ള ആണ്‍-

മയിലുകള്‍ തൂങ്ങിക്കിടക്കും

ഭയക്കരുത്

ഗിരിശൃംഖത്തിന്റെ

നെറുകയിലേക്കുള്ള ഒറ്റ-

വരിപ്പാലം തകര്‍ക്കുക

കദംബ മരച്ചുവട്ടില്‍ കൈകള്‍ കോര്‍ത്ത്

കണ്ണടച്ചു ധ്യാനിക്കുക

വസന്തം ചെറിപ്പൂക്കളോടെന്ന പോലെ

അവളുടെ പിന്‍ കഴുത്തില്‍

ഒരിക്കല്‍ ഒരേയൊരിക്കല്‍

പ്രാണന്റെ പിടച്ചില്‍ മുദ്രണം ചെയ്യുക

മദജലമൂറുന്ന നയനങ്ങളില്‍ നിന്ന്

ഒരാമ്പല്‍പ്പൂ പിഴുതെടുത്ത്

ഓര്‍മ്മയുടെ ഉപ്പുഖനിയിലേക്കെറിയുക

തിരിഞ്ഞു നടക്കുക.

ഇങ്ങനെയും ഒരു മീര.....

2008-02-06T21:38:00.000+05:30

ഗ്ലാസില്‍ അവശേഷിച്ച ബ്ലഡിമേരി ഒറ്റവലിക്ക് അകത്താക്കി
നാരായണന്‍ കുട്ടി ഒരു സിഗരറ്റിനു തീ കൊളുത്തി,താന്‍ അഗാധവും ഇരുണ്ടതുമായ
ഒരു ഗര്‍ത്തത്തില്‍ പതിച്ചിരിക്കുകയാണെന്ന് അയാള്‍ക്കു തോന്നി.ക്രൌര്യം നിറഞ്ഞ
കണ്ണുകളോടെ ശവഗന്ധം പേറുന്ന നാലു ചുവരുകള്‍ക്കിടയില്‍ ദുര്‍മ്മേദസ്സടിഞ്ഞു
മാംസളമായ ആ ശരീരം അങ്ങോട്ടുമിങ്ങോട്ടും നടന്നു.

അടുത്ത മുറിയില്‍ വാഷിംഗ് മെഷീനിന്റെ മുരള്‍ച്ച നിലച്ചു. വാതിലുകളടയുന്ന ശബ്ദം
കേട്ടപ്പോള്‍ ഇരയുടെ വരവു കാത്ത്‌ അക്ഷമനായ വേട്ടമൃഗത്തെപ്പോലെ അയാള്‍ ജാഗരൂകനായി
ഇന്നു രണ്ടിലൊന്നറിയണം! പതിവ്രത ചമയുന്ന അവളുടെ മുഖം മൂടി ഞാന്‍ പിച്ചി ചീന്തും
നാരാണന്‍ കുട്ടി മനസ്സു ദൃഡമാക്കി.

ഉറക്കച്ചടവുള്ള കണ്ണുകളുമായി ഒരു സ്ത്രീരൂപം മുറിയില്‍ പ്രവേശിച്ചു.കയറിയപാടേ തന്റെ
വാനിറ്റിബാഗ് തുറന്ന് രണ്ടു ഗുളികകള്‍ വിഴുങ്ങി.അവള്‍ കിടക്കയിലേക്കു ചെരിഞ്ഞു
നാരായണന്‍ കുട്ടി ചുട്ടുപഴുത്ത ഉല പോലെ ചുവന്നു.തന്റെ കയ്യിലിരുന്ന കടലാസ്സു തുണ്ടിലേക്കയാള്‍
തുറിച്ചു നോക്കി.കുനിയനുറുമ്പു നിരയിട്ടപോലെ അതില്‍ നിറഞ്ഞ പ്രണയാക്ഷരങ്ങള്‍ അയാളേ നോക്കി പല്ലിളിച്ചു.

മീരേ......................
ആരാടീ‍ ഈ വാസുദേവ്?.......
അവുന്നത്ര ശബ്ദമുയര്‍ത്തിയാണ് അയാളാതു ചോദിച്ചത്.അപസ്മാരം ബാധിച്ചതു പോലെ മാംസഗോപുരം ഇളകി വിറച്ചു.

കണ്ണുകളില്‍ ആവുന്നത്ര നിസ്സംഗത നിറച്ച് മീര തലയുയര്‍ത്തി
കുഞ്ഞുണരും പതുക്കെ...

ഒരു നികൃഷ്ട ജീവിയെ നോക്കുന്നതു പോലെ അയാളവളെ തുറിച്ചു നോക്കി,.ചോദ്യം അവര്‍ത്തിച്ചു.
തലയിണയില്‍ നിന്നു മുഖമുയര്‍ത്താതെ ഉറച്ച ശബ്ദത്തില്‍ അവള്‍ പ്രതിവചിച്ചു

എന്റെ കാമുകന്‍!!!!!!

അവിശ്വസനീയമായ എന്തോ കേട്ട പോലെ നാരയണന്‍ കുട്ടി പതറി
അയാള്‍ ദയനീയമായി തന്റെ ഭാര്യയെ നോക്കി.
മീര എഴുന്നേറ്റിരുന്നു ആ മുഖത്ത് ഒരു ചെറു ചിരി ഓളം തല്ലി.
അയാളും വേദനയോടെ മന്ദഹസിച്ചു.

അടുത്തനിമിഷം അയാളുടെ മുഖഭാവം മാറി ശരീരം വലിഞ്ഞു മുറുകി പല്ലുകള്‍ ഞെരിച്ചു പൊടിച്ചു കൊണ്ട്‌ ചീറി
സ്കൌന്‍ഡ്രല്‍.. നിനക്കു ഭ്രാന്താണു മീരാ മുഴു ഭ്രാന്ത്!!!

അതേയോ......മീര പരിഹസിച്ചു.

ആ തമാശയ്ക്കു പിന്നിലെ മനോവിചാരം പിടി കിട്ടാത്തതു പോലെ അയാള്‍ സന്ദേഹത്തോടെ മീരയെ നോക്കി.

എനിക്കറിയാം ഓരോരുത്തര്‍ക്കും ഓരോ തലവിധിയാണ് അതനുഭവിച്ചേ തീരൂ
എന്റെ ജീവിതം നീ തുലച്ചു.അയാള്‍ പിറുപിറുത്തു.

മീര പൊട്ടിച്ചിരിച്ചു. കിടപ്പുമുറിയിലെ എല്ലാ സ്ഥാവരജംഗമ വസ്തുക്കളും ആ ചിരിയില്‍ പങ്കു ചേര്‍ന്നു.നാരായണന്‍ കുട്ടി ഒഴികെ...

അയാളുടെ കണ്ണുകളില്‍ ദൃഷ്ടിയുറപ്പിച്ച് അവള്‍ പറഞ്ഞു
നിങ്ങളുടെ കണ്ണുകളിലെ അനല്പമായ ആനന്ദം എത്ര ഒളിച്ചു വച്ചാലും പുറത്തു വരും!!! നിങ്ങള്‍ ഒരു നല്ല അഭിനേതാവല്ല.എന്റെ അസാന്നിദ്ധ്യം നിങ്ങള്‍ ആഗ്രഹിക്കുന്നു അവളുടെ തറച്ച നോട്ടത്തിനു
മുന്നില്‍ അയാള്‍ ചൂളി

നമ്മുടെ വിവാഹം കഴിഞ്ഞിട്ടെത്ര വര്‍ഷമായി?

ആഹ് ആറെഴു വര്‍ഷമായിക്കാണും നാരായണന്‍ കുട്ടി ഉദാസീന ഭാവത്തില്‍ മറുപടി പറഞ്ഞു.
ആറേഴല്ല ആറു വര്‍ഷം 8മാസം പതിനേഴു ദിവസം....

ഞാനതൊന്നും ഓര്‍ത്തു വയ്ക്കാറില്ല
ഞാനെല്ലാം ഓര്‍ക്കുന്നു ...പരോളുകളില്ലാത്ത ജീവപര്യന്തം
ഈ കാലത്ത് നമ്മളൊരുമിച്ച് ഉണ്ടായിരുന്നത് എത്ര നാളെന്നറിയുമോ?
നിങ്ങള്‍ ചിരിക്കുകയും ഞാന്‍ കരയുകയും ചെയ്ത ദിവസങ്ങള്‍

അയാള്‍ കണ്ണുകളുയര്‍ത്തി ചോദ്യഭാവത്തില്‍ നോക്കി..
തെര്‍ട്ടി വണ്‍ പ്രഷ്യസ് ഡെയ്സ്.....

നീയൊരു ചാര്‍ട്ടേഡ് അക്കൌണ്ടിനെ പോലെ സംസാരിക്കുന്നു..നാരായണന്‍ കുട്ടി ക്രുദ്ധനായി

മീര ചുണ്ടു കോട്ടി ചിരിച്ചുകൊണ്ടു ഭര്‍ത്താവിനെ നോക്കി
മത്സ്യം മത്സ്യമായിരിക്കുന്ന കാലത്തോളം കടലിനെ മനസ്സിലാവില്ല പുരുഷന്‍ പുരുഷനായിരിക്കുന്ന കാലത്തോളം സ്ത്രീയേയും....

വേദാന്തം!!അയാള്‍ മുരണ്ടു..ജീവിതം കരുപ്പിടിപ്പിക്കാനുള്ള ഓട്ടത്തിനിടയില്‍ സാക്രിഫൈ‍സുകള്‍ വേണ്ടി വരും

അവളുടെ മുഖത്തു രക്തം ഇരച്ചു കയറി..ഏഴു വര്‍ഷം ഏകാന്ത തടവനുഭവിക്കേണ്ട തെറ്റൊന്നും ഞാന്‍ ജീവിതത്തില്‍ ചെയ്തിട്ടില്ല...മീര തിരിച്ചടിച്ചു.

ഈ മഹാനഗരത്തില്‍ നീ ഒരു പെണ്ണു മാത്രമല്ല ഒറ്റയ്ക്കു ജീവിക്കുന്നത്
തുപ്പലും ശാപവാക്കുകളും ഒരുമിച്ച് അവളുടെ മുഖത്തേക്കു തെറിച്ചു

മീരയുടെ മനസ്സില്‍ രൂക്ഷമായ ഒരു പൊട്ടിത്തെറി നടന്നു.
മെല്ലെ മൃദുവായി അവള്‍ ഭര്‍ത്താവിനെ പേരു ചൊല്ലി വിളിച്ചു.
ആയിരിക്കാം ഏട്ടാ...അവരാരും മീരയല്ല

ഉറഞ്ഞുപോയ എന്നെ ഉണര്‍ത്തുന്ന ഇളം ചൂടായിരുന്നു വസുദേവ്.ഈ കെട്ടിക്കിടപ്പിനെ കുറച്ചു നേരമെങ്കിലും
സ്ഫടിക സമാനമാക്കിയ എന്തോ ഒന്ന്. വെള്ളത്തില്‍ വെയിലെന്ന പോലെ അവനെന്നില്‍ പ്രവേശിച്ചു,ഞാന്‍ തിളച്ചു മറിയാന്‍ തുടങ്ങിയപ്പോള്‍ അവന്‍ ഭയന്ന് പിന്‍ വാങ്ങി യെങ്കിലും എനിക്കവനോടു നന്ദിയുണ്ട്.

നാരായണന്‍ കുട്ടി ജ്വലിച്ചു...അല്ലാതെ ശരീരത്തിന്റെ ആസക്തിയല്ല!!!!! പതിവ്രതയാണെന്ന വിളംബരം..ഒട്ടും മാര്‍ദ്ദവമല്ലാത്ത ശബ്ദത്തില്‍ അയാള്‍ ഈര്‍ഷ്യയോടെ മൊഴിഞ്ഞു.

മീര സ്വയം മറന്നു പൊട്ടിച്ചിരിച്ചു.....ആണെങ്കിലെന്താ? കിടപ്പറയിലെ ബലിക്കല്ലില്‍ എന്നെ വെള്ളം തളീച്ചു കിടത്തി എള്ളും പൂവും നിവേദിച്ച് മൊബൈല്‍ റിംഗിനു ചെവിയോര്‍ക്കുന്ന നിങ്ങളേക്കാള്‍ ഭേദമാകും അവന്‍..നെഞ്ചില്‍ കൈവച്ചു പറയാമോ? നിങ്ങളൊരു വിടനല്ലെന്ന്? മറ്റൊരു ശരീരത്തെയും പ്രാപിച്ചിട്ടില്ലെന്ന്? അത് കണ്ണീരിന്റെ ഉപ്പുകലര്‍ന്ന വിലാപമായിരുന്നില്ല നിത്യനരകത്തിന്റെ നെഞ്ചു പൊട്ടിയ അലമുറയായിരുന്നു അലര്‍ച്ചയുടെ അനുരണനങ്ങള്‍ നാലു പഴഞ്ചന്‍ ചുവരുകളില്‍ തലതല്ലി ചത്തു.

അടക്കിവച്ച എല്ലാ ഊര്‍ജ്ജവും വിനിയോഗിക്കപ്പെട്ട അവളുടെ ഭൌതികശരീരത്തിന്റെ കൈകാലുകള്‍ കോച്ചിപ്പിടിച്ചു. ചുണ്ടു കോടി...വീണു പോകാതിരിക്കാന്‍ കട്ടിലിന്റെ കൈപ്പിടിയില്‍ അവള്‍ മുറുകെ പിടിച്ചു
പൊട്ടിത്തെറിക്കു ശേഷമുള്ള ശാന്തത ആ ശരീരത്തെ വലയം ചെയ്തു.

എന്തു പറയണമെന്നറിയാതെ അയാള്‍ നിശ്ശബ്ദനായി.പുരുഷാരത്തിനു മുന്നില്‍ ഉടുതുണിയഴിഞ്ഞതു പോലെ വിയര്‍ത്തു.ഒടുവില്‍ ആ തടിച്ച മുഖം കുനിഞ്ഞു.

പതുക്കെ മീര ഭര്‍ത്താവിന്റെ മുഖം പിടിച്ചുയര്‍ത്തി.
എനിക്കൊന്നുമില്ല വെറുതെ ചോദിച്ചതാണ്,ഓരോ പുരുഷനും ഭയപ്പെടുന്ന ചില ചോദ്യങ്ങളുണ്ട്‌.അത്തരത്തില്‍
പെട്ട ഒന്നാണു ഞാന്‍ ചോദിച്ചത്`.മറുപടി വേണ്ട, ഞാനതു പിന്‍ വലിക്കുന്നു.

പരിഹാസം കലിക്കുന്ന കടുവാചകം അയാളേ പരിക്ഷീണനാക്കി.ഡിയോഡ്രന്റിന്റെ കൃത്രിമ സൌരഭ്യം മറി കടന്ന് വിയര്‍പ്പിന്റെ ഉളുമ്പു നാറ്റം അവിടെയെല്ലാം വ്യാപിച്ചു.തെല്ലൊരു ഭീതിയോടെ അയാള്‍ ഭാര്യയെ നോക്കി.അവളപ്പോള്‍ കടല്‍ക്കരയിലെ ചവോക്കു മരത്തണലില്‍ വസുദേവിന്റെ നെഞ്ചില്‍ മുഖം പൂഴ്ത്തി മഞ്ഞ ചായം തേച്ച ഒറ്റമുറി വീട് സ്വപ്നം കാണുകയായിരുന്നു.
മീരേ......നാരായണണ്‍ കുട്ടി ചുണ്ടനക്കി...

ആ വിളി സൌമ്യവും ആര്‍ദ്രവുമായിരുന്നു..
നീയെന്നെ എപ്പോളെങ്കിലും സ്നേഹിച്ചിട്ടുണ്ടോ?
ചോദ്യം ദയ അര്‍ഹിച്ചിരുന്നു..
മീര അവളോടു തന്നെ നൂറുവട്ടം ആ ചോദ്യം ആവര്‍ത്തിച്ചു...
വേവാത്ത ഇറച്ചിക്കഷണം പോലെ ഉത്തരം അവളുടെ തൊണ്ടയില്‍ വിലങ്ങനെ കിടന്നു.

ഉത്തരം ആവശ്യമില്ലാത്തതു പോലെ അയാള്‍ തിരിഞ്ഞു കിടന്നു
പാതിമയക്കത്തില്‍ താന്‍ കിടക്കയിലമരുന്നതായും ഉളുമ്പു നാറ്റം തന്റെ ഓരോ അണുവിലും വ്യാപിക്കുന്നതായും മീരയറിഞ്ഞു.മാംസക്കൊളുത്തുകള്‍ വലിച്ചു മുറുക്കി ബലിതര്‍പ്പണത്തിനായി അവള്‍ കണ്ണടച്ചു കിടന്നു.

പിറ്റേന്നു രാവിലെ അയാള്‍ മറ്റൊരു യാത്രയ്ക്കായി ഒരുങ്ങുമ്പോള്‍ അയാളുടെ ഭാര്യ അടുത്തു ചെന്നു.കുപ്പായത്തിന്റെ കുടുക്കിടുന്ന സൂക്ഷ്മ പ്രവൃത്തിക്കിടയില്‍ അവള്‍ മൊഴിഞ്ഞു

നമുക്കൊരു ഡൈവഴ്സിനു ശ്രമിക്കാം ജോയ്യിന്റ് പെറ്റീഷനാകുമ്പോള്‍ അനുവദിച്ചു കിട്ടാന്‍ പ്രയാസമുണ്ടാവില്ല.

അയാള്‍ ഒന്നും മിണ്ടാതെ കഴിഞ്ഞ വര്‍ഷം യാത്ര പോകുമ്പോള്‍ ചെയ്ത പോലെ അവള്‍ക്കൊരുമ്മ കൊടുത്തു.കണ്ണില്‍ നിന്നു കാര്‍ മറയുന്നതു വരെ അവള്‍ നിര്‍ത്താതെ കൈ വീശി.

നിനക്ക്

2008-01-27T21:25:00.000+05:30

മൈമൂന
ഇന്നെന്റെ മടിയിലിരിക്കാറില്ല

ഇല്ലാപ്പേനകൊണ്ടെന്റെ
കുപ്പായത്തില്‍
കുത്തി വരയ്ക്കാറില്ല.

കുഞ്ഞു വയറ്റില്‍
വിശപ്പിന്റെ കോഴിക്കുഞ്ഞുങ്ങള്‍
കൊത്തിപ്പെറുക്കുമ്പോഴും
കിളിയുരുട്ടയ്ക്ക്
കൈ നീട്ടാറില്ല

ഉന്നക്കായ പൊട്ടിയ പോലെ
പൂമ്പാറ്റക്കുഞ്ഞുങ്ങള്‍
ക്ഷേത്ര നടയില്‍
പാറിപ്പറക്കാറില്ല

ഉദ്യാന പാലകന്റെ
കൈത്തണ്ട്ണ്ടയിലെ
ഊഞ്ഞാലുകള്‍
പൊട്ടിപ്പോയിരിക്കുന്നു

കുറുങ്ങിപൂച്ച ചത്തതും
മയില്‍പ്പീലി പെറ്റതും
വാടാര്‍മല്ലി പൂത്തതും
കേട്ടുമറന്ന കഥകള്‍

ചിറകുകളരിഞ്ഞ്
ഭയത്തിന്റെ
നെല്ലിപ്പടവിലേക്ക്
എന്റെ കുഞ്ഞുങ്ങളെ
വലിച്ചെറിഞ്ഞതു നീയാണ്

നിനക്കു ഭക്ഷിക്കാന്‍
മുയല്‍ക്കുഞ്ഞിന്റെ
ചങ്കും കരളും തന്നെ
വേണമായിരുന്നോ?

ആത്മനിന്ദയുടെ എഴുത്താണി
ഹൃദയത്തിലാഴ്ന്നിറങ്ങുമ്പോള്‍.
നീ
ഹൃദയം മറയ്ക്കുന്ന രുദ്രാക്ഷവും
ശുഭ്ര വസ്ത്രവുമായി
ആള്‍ക്കൂട്ടത്തില്‍ ലയിക്കുന്നു.

മൂക്കൊലിപ്പുള്ള ദൈവം

2008-01-20T22:45:00.000+05:30

ഓണ്‍ യുവര്‍ മാര്‍ച്ച് സാറ്റ്..........
സ്റ്റാര്‍ട്ടിംഗ് പോയിന്റില്‍ വാസു മാഷിന്റെ വിസില്‍ മുഴങ്ങി.കണാരു ചീറ്റപ്പുലിയെപ്പോലെ കാലുകള്‍ പറിച്ചെറിഞ്ഞു.കുടുക്കില്ലാത്ത കുപ്പായം കെട്ടു പൊട്ടിയ പട്ടം പോലെ വായുവില്‍ പറന്നു നടന്നു. മൈതാനം പൊടിയില്‍ മുങ്ങി.ചവിട്ടിത്തള്ളിയ മണല്‍ത്തരികളില്‍ ഓന്റെ പക ഞെരിഞ്ഞമര്‍ന്നു.പുരുഷാരം നിര്‍ത്താതെ കരഘോഷം മുഴക്കി.
ഓട്ടത്തിനിടയില്‍ ഓനൊന്നു തിരിഞ്ഞു നോക്കി.വെള്ളക്കൂറ സത്യനും അണ്ടിക്കണ്ണച്ചന്റെ മോന്‍ സുകുവും വെച്ചു പിടിക്കുന്നുണ്ട്.കണാരുവിന്റെ പീളകെട്ടിയ കണ്ണുകളിലേക്ക് രക്തം ഇരച്ചു കയറി.ഓനിപ്പോള്‍ പായുന്നതു കൊല്ലത്തി ജാനൂന്റെ നെഞ്ഞിലൂടെയാണ്,ഉയ്ത്തുകാരന്‍ കോവാലന്‍ ഉഴുതു മറിച്ചിട്ട ഉര്‍വ്വര ഭൂമിയിലൂടെയാണ്.ആനക്കാരന്‍ നാരാണന്റെ തോട്ടിയില്‍ ജാനു പിടയ്ക്കുകയാണ്.പപ്പടം വാസു ചേമ്പിന്‍ കണ്ടത്തില്‍ പതുങ്ങിയിരിപ്പുണ്ട്.കണാരുവിന്റെ അണപ്പല്ലുകളില്‍ ഓര്‍മ്മകള്‍ ചതഞ്ഞരഞ്ഞു.

കോയിന്നന്റെ തയ്യല്‍ക്കടയില്‍ നിന്ന് ഇസ്ക്കിയ ചോന്ന റിബണ്‍ ചപ്രാച്ചിത്തലയില്‍ വിയര്‍പ്പില്‍ കുതിര്‍ന്നു കിടന്നു

കുമ്മായ വരയിലൂടെ ഒരു വെടിച്ചില്ലു പാഞ്ഞു പോയി.പെരാന്തന്‍ കുമാരന്‍ മുറിബീഡി വലിച്ചെറിഞ്ഞ് ഓനെ കെട്ടിപ്പിടിച്ച് പൊള്ളുന്ന ഒരുമ്മ കൊടുത്തു .രാമദാസന്‍ മാഷ് ചിരിച്ചു.സൌമിനി ടീച്ചര്‍ വിജയചിഹ്നങ്ങള്‍ കാണിച്ചു.കോഴിവത്സലയുടെ മൂക്കിന്‍ തുമ്പത്ത് സ്വേദകണങ്ങള്‍ പൊടിഞ്ഞു.നെരുന്ത് ലീല നിര്‍ത്താതെ കയ്യടിച്ചു.

അശ്വമേധം തുടങ്ങി ആരും പിടിച്ചു കെട്ടാനില്ലാത്ത വിറളി പിടിച്ച കുതിര നിര്‍ത്താതെ ചെനച്ചു അതിന്റെ ചെരങ്ങു പിടിച്ച കാലുകളില്‍ കൊടുങ്കാറ്റ് കുരുങ്ങിക്കിടന്നു, ചോന്ന കണ്ണുകളില്‍ നിന്ന് വാരിക്കുന്തങ്ങള്‍ ചീറിപ്പാഞ്ഞു.ഭൂഗുരുത്വത്തിനു നേരെ പല്ലിളിച്ചു കൊണ്ട് അത്‌ ഉയര്‍ന്നു പൊങ്ങി.ഇന്നതിനു ഉളുമ്പു നാറ്റമില്ല, ഇന്ന് കനോലിക്കനാലിലൂടെ അഴുക്കു വെള്ളം ഒഴുകില്ല.ഉപ്പിട്ട നാരങ്ങ വെള്ളവും ഗ്ലൂക്കോസു പൊടിയുമായി മൊലയും തലയുമുള്ള പെണ്ണുങ്ങള്‍ അതിന്റെ പിറകെ നടന്നു.

അയനിപ്ലാവിന്റെ ചോട്ടില്‍ തോറ്റോടിയ പടയാളിയെപ്പോലെ ഒന്നരക്കാലുമായി ഒരു ചെക്കന്‍ തലകുനിച്ചു നിന്നു.ഒടിഞ്ഞ കയ്പ്പത്തണ്ടു പോലുള്ള ഇടത്തെക്കാലില്‍ ഓന്‍ അഞ്ഞാഞ്ഞു ചവിട്ടി. വേദന ചെക്കന്റെ കണ്ണുകള്‍ നനയിച്ചു.

ചെമന്ന മോറും മഞ്ഞക്കണ്ണുമായി കണാരു ചെക്കന്റെ അടുത്തു വന്നു.ഓന്റെ കണ്ണുകളില്‍ നൂറു സൂര്യന്മാര്‍ കത്തിജ്വലിച്ചു നിന്നിരുന്നു.

ന്താടാ ന്റാരെങ്കിലും ചത്തോ?ഞ്ഞിയെന്ത ഒന്നിനും കൂടാത്തെ?

ചെക്കന്‍ തല കുമ്പിട്ടു,പ്രകാശം കെട്ട അവന്റെ കണ്ണുകളില്‍ കരിവീട്ടി പോലുള്ള കണാരൂന്റെ കാലുകള്‍ ചിത്രം വരച്ചു.ഓന്‍ വിതുമ്പിപ്പോയി.മനസ്സിന്റെ അജ്ഞാതമായ ഒരു തുള്ളല്‍ സഹിക്കാന്‍ വയ്യാഞ്ഞിട്ടെന്ന പോലെ കണാരു മെല്ലെപ്പറഞ്ഞു ഞാന്‍......ഞാന്‍.... വിഷമിപ്പിക്കാനല്ല പറഞ്ഞത്.
ചങ്ങായീ ഇനി റൊട്ടിതിന്നലാണ്, ഓട്വൊന്നും മാണ്ടാലോ? ഞ്ഞീം കൂടിക്കോ,ന്തായാലും ഇമ്മാതിരിക്കളിക്ക് ഞമ്മളില്ല.
ചെക്കന്റെ കണ്ണുകളിലേക്ക് ഒരു നുള്ളു വെളിച്ചം നക്ഷത്രകൂട്ടത്തില്‍ നിന്നു പൊട്ടിവീണു.
മനസ്സുമന്ത്രിച്ചു കണാരുവില്ല
തലച്ചോറു പറഞ്ഞു കണാരുവില്ല!

മൈതാനത്തു വലിച്ചു കെട്ടിയ ചൂടിയില്‍ പുളിച്ച മുന്തിരിക്കുലകള്‍ പോലെ റൊട്ടിക്കഷണങ്ങള്‍ ഞ്ഞാന്നു കിടന്നു.വാസു മാഷ് ചെക്കന്റെ കയ്യ് പിന്നില്‍ നിന്നു കെട്ടി.
പാവം ചുറ്റും നോക്കി .മെരു റഷീദുണ്ട്,വെള്ളക്കൂറ സത്യനുണ്ട്,ങ്ങര്‍ ബാബുവുണ്ട്!!!!

പടച്ചോനെ ഇപ്പഹയന്മാരെയാണൊ ഞാന്‍ തോല്പിക്കേണ്ടത്? ഓന്റെ മനസ്സു പതറി.സ്പ്രിങ്ങു മുടിയുള്ള കാന്താരി ബിന്ദു ഒന്നരക്കാലു നോക്കി കണ്ണിറുക്കി.ല്ലാവരും ന്നെ നോക്കുകയാണ്........ ഓന്‍ പതുക്കെ കണ്ണുകളുയര്‍ത്തി,റൊട്ടിക്കഷണങ്ങള്‍ മാത്രം ഓന്റെ റെറ്റിനയില്‍ അവശേഷിച്ചു.ഞൊണ്ടിക്കാലന്‍ ഉയര്‍ന്നു ചാടി; പല്ലിനിടയില്‍ യന്ത്രക്കിളി കുരുങ്ങുന്നതിനു മുമ്പെ കാലു തറയില്‍ തൊട്ടു.വെള്ളക്കൂറ നിര്‍ത്താതെ ചാടിക്കൊണ്ടിരുന്നു.

ഇല്ല ഞാന്‍ തോല്‍ക്കില്ല, എല്ലാ തോല്‍ വികളും എനിക്കു വേണ്ടി സൃഷ്ടിക്കപ്പെട്ടതല്ല...ഈ മത്സരം നിനക്കുള്ളതാണ്...കാതില്‍ അരോ പറയുന്നതു പോലെ! ചെക്കന്‍ മനസ്സ് ഏകാഗ്രമാക്കി.സകല
പടച്ചോന്മാരെയും മനസ്സില്‍ നിരീച്ച് തറയിലേക്കു വലിച്ചെറിഞ്ഞ ഒരു റബ്ബര്‍ പന്തു പോലെ ഒന്നരക്കാലന്‍ ഉയര്‍ന്നു പൊങ്ങി......
കാണികളുടെ ആരവം, കൂക്കുവിളി കയ്യടി.......
റൊട്ടിയുടെ രുചി നാവിലെ രസമുകുളങ്ങള്‍ തിരിച്ചറിഞ്ഞു...
പെട്ടെന്ന് ആരവം അടങ്ങി....

കൊടുങ്കാറ്റിനു മുന്നിലെ നിശ്ശബ്ദത...വലിച്ചുകെട്ടിയ നിക്കറിന്റെ കെട്ടുപൊട്ടി തുടയിലൂടെ ഊര്‍ന്നിറങ്ങുന്നതു ചെക്കനറിഞ്ഞു...നിശ്ചലമായ വായുവില്‍ “ണ്ടാമണ്ടി“ തൂങ്ങിക്കിടന്നു.പിന്നില്‍ പിണച്ചു കെട്ടിയ കൈകള്‍ ഉറക്കെ നിലവിളിച്ചു.ഒന്നരക്കാലന്റെ കണ്ണുകള്‍ ദയനീയമായി വാസുമാഷിലേക്കു നീണ്ടു....

കാലായക്കോട്ടയ്ക്കു തീപിടിച്ചു...
മെരു റഷീദ് കൂവി
നമ്പ്യാരു മാഷ് അസ്ഥാനത്ത് മീറു കേറിയ പോലെ തുള്ളിക്കളിച്ചു
സൌമിനി ടീച്ചര്‍ മുലയും തലയുമിളക്കി..
നെരുന്ത് ലീല കണ്ണു പൊത്തി...
ചിരി പ്ലേഗു പോലെ പടര്‍ന്നു.

പാവം ഞൊണ്ടിക്കാലന്‍ കണ്ണുകള്‍ ഇറുക്കിയടച്ചു.ന്നിട്ടും പീലികള്‍ക്കിടയിലൂടെ നീര്‍ച്ചാലുകള്‍ പൊട്ടിയൊഴുകി.ആള്‍ക്കൂട്ടത്തിനിടയില്‍ ഒരു ശവം വെറുങ്ങലിച്ചു നിന്നു.
ചങ്ങായീ......കടലിന്റെ അടിയില്‍ നിന്നൊരു ശബ്ദം...മെല്ലെ മൃദുവായി....
ചെക്കന്‍ കണ്ണു തുറന്നു...മുന്നില്‍ ചപ്രാച്ചി മുടിയും മഞ്ഞക്കണ്ണുകളുമായി ദൈവം....ദൈവത്തിന്റെ മൂക്കിന്‍ തുളയില്‍ നിന്നും കണ്ണുകളില്‍ നിന്നും വേദനയുടെ വെള്ളച്ചാട്ടങ്ങള്‍...
പടച്ചോന്‍ മിന്നല്‍ കണക്കെ തിരിഞ്ഞു..മെരു റഷീദിന്റെ കണ്ണുകള്‍ തുറിച്ചു...പടച്ചോന്‍ അലറി
“ന്താ നായിന്റെ മോനെ അനക്കില്ലാത്തതെന്താ ഓനുള്ളത്?”

ആ ചോദ്യം മെരു റഷീദിനോടല്ല....
ആ ചോദ്യം വെള്ളക്കൂറയോടല്ല...
അതു വാസു മാഷോടാണ്....
പുരുഷാരത്തോടാണ്...
ഈ ലോകത്തോടാണ്....

ഇലകള്‍ വീണ ഇട വഴിയിലൂടെ നിഴലുകള്‍ ചവിട്ടി പടച്ചോന്‍ അണ്ടിക്കണ്ണച്ചന്റെ വൃത്തിക്കമാവിന്‍ തോട്ടത്തിലേക്കു നടന്നു.......
തുടരും..

ബലൂണുകളുടെ നൃത്തം

2008-01-13T18:52:00.000+05:30

കാലത്തിനു കുറുകെയുള്ള ഒറ്റയടിപ്പാതയിലൂടെ മറവിയുടെ പച്ചപ്പൂപ്പലുകള്‍ നാലുപാടും തെറിപ്പിച്ചു കൊണ്ട്‌ ഒരു തൊണ്ട്‌ അതിവേഗം ചലിച്ചു.അത്ഭുതകരമായ കൈ മെയ് വഴക്കത്തില്‍ കാട്ടപ്പക്കമ്പിന്റെ അറ്റത്ത്‌ അതു കുരുങ്ങിക്കിടന്നു.മാന്ത്രിക ദണ്ഡിന്റെ മറ്റേയറ്റം കണാരുവിന്റെ കയ്യില്‍ ഭദ്രമായിരുന്നു.തൊണ്ടുരുണ്ടു നീങ്ങുന്നത് ടീച്ചറമ്മയുടെ വീട്ടിലേക്കാണ്.

അവിടെ ഓനെക്കാത്ത് ടീച്ചറമ്മയുടെ തലതെറിച്ച സന്താനമിരിപ്പുണ്ട്‌.
കണാരുവും തൊണ്ടും ഉമ്മറത്ത്‌ കിതച്ചു നിന്നു.ഓന്റെ കുപ്പായം ചേറും തഴമ്പും പിടിച്ചതും പിന്‍ഭാഗം മണ്ണിലുരഞ്ഞു കീറിയതുമായിരുന്നു.
ഉണക്കമീനിന്റെയും ചുട്ട അണ്ടിയുടെയും ഇണങ്ങാത്ത ഗന്ധങ്ങള്‍ അവനെ ചൂഴ്ന്നു നിന്നു.
കണാരു നടുത്തളത്തിലേക്കൊന്നു പാളി നോക്കി;ഇല്ല ആളനക്കമില്ല.
ആരൂല്ലെ ഇബിടെ?ഓന്റെ മഞ്ഞക്കണ്ണുകള്‍ തിളങ്ങി!
ഇല്ല ന്തേയ്?
വിശാസം വരാത്ത മട്ടില്‍ ഓന്‍ ചാഞ്ഞും ചെരിഞ്ഞും നോക്കി,ടീച്ചറമ്മ ണ്ടോ ഞ്ഞി സത്യം പറ ചങ്ങായീ?
കോട്ടേലെ പാമ്പാണെ ഇല്ല പോരെ.
കണാരു ചിരിച്ചു, നനഞ്ഞ ചിരി
ഇബിടെന്തെങ്കിലും തിന്നാനുണ്ടോ? ചോറു ബെയ്ച്ചിട്ടു രണ്ടീസായി.പിന്നിലേക്കു കൂര്‍ത്ത ഓന്റെ ചെവി എന്റെ വായിലേക്കു നീണ്ടു അതില്‍ ആകാംഷയും വിശപ്പും പുരണ്ടിരുന്നു.
ടീച്ചറമ്മേടെ മോന്റെ മനസ്സലിഞ്ഞു,പഴയ അമൂല്‍ ടിന്നിലെ അണ്ണാച്ചി മിച്ചറിനു മുന്നില്‍ കണാരു ബകനായി.
ഡാ ഞ്ഞി മുഴുവന്‍ വെട്ടിവിഴുങ്ങല്ലെ അമ്മ പൊറം ചെണ്ടയാക്കും,എന്റെ കണ്ണുകളിലെ ദയനീയത കണാരു തിരിച്ചറിഞ്ഞില്ല.
ഞ്ഞി പോഡാ! ടീച്ചറമ്മ പാവം... ഓറ് ന്റെയും അമ്മയാ..അവസാനത്തെ വാക്കിനൊപ്പം മിച്ചറിന്റെ മൂന്നാലു കോലുകള്‍ എന്റെ മൊകത്തേക്കു തെറിച്ചു.ഓന്റെ തമാശകേട്ടു ഞാന്‍ ചിരിച്ചു.പാവം!
ഒതിയാര്‍ക്കമില്ലാത്ത വെടക്കുചെക്കനുമായുള്ള കച്ചോടം എന്നു നിര്‍ത്തുന്നോ അന്നേ ഇത്തലതെറിച്ചോന്‍
“നേരെയാവൂന്ന് ഇന്നു രാവിലെയും ടീച്ചറമ്മ പ്രാകിയതു കണാരു കേട്ടിട്ടില്ലല്ലോ!!
പല്ലിനുമുകളില്‍ പറ്റിയ മിച്ചറിന്റെ പരലുകള്‍ നാക്കു കൊണ്ടു തുഴഞ്ഞെടുത്ത് കണാരു എന്റടുത്തേക്കു നീങ്ങിയിരുന്നു,ഒരുകൂട്ടം കാണിച്ചു തരട്ടെ?ന്റെ കയ്യില്‍ പൊട്ടാത്ത ബലൂണുണ്ട്,ത്ര വീറ്പ്പിച്ചാലും പൊട്ടൂല.
പോടാ ബഡായി,സൊള്ള്‌,ന്നെ പറ്റിക്കാനല്ലെ?
ന്നാഞ്ഞി കണ്ടോ, ഓന്റെ മൊകത്ത് ഗൌരവം
കണാരു തികഞ്ഞ ശ്രദ്ധയോടെ ബലൂണ്‍ ചുണ്ടില്‍ ചേര്‍ത്തു,ബലൂണ്‍ വീര്‍ക്കാന്‍ തുടങ്ങി,ഉണ്ണിമാങ്ങ,തൊണ്ടന്‍ മാങ്ങ,ഉണ്ടച്ചക്ക,വരിക്കച്ചക്ക,അതിന്റെ ആകൃതി അനുനിമിഷം മാറുകയാണ്.
മതി കണാരു അതിപ്പം പൊട്ടും,ഇനിക്ക് പേടിയാവുന്നു
ഓന്‍ നിര്‍ത്തുന്നില്ല ബലൂണിന്റെ ഓരോ തന്മാത്രയും ഇലാസ്തികതയുടെ പരമ്യത്തിലേക്കു കുതിക്കുകയാണ്.ന്റെ കണ്ണുകളും.ഓന് ശ്വാസം മുട്ടുന്നുണ്ട്‌,ചാലിട്ട മൂക്കള ബലൂണിലൂടെ ഒഴുകി നിലത്തു വീണു പടര്‍ന്നു.ടീച്ചറമ്മേടെ തലതെറിച്ച മോന്‍ ഉറക്കെ നെലവിളിച്ചു...ഡാ പന്നീ‍ നിര്‍ത്ത്...
കാറ്റുപോയ ബലൂണ്‍ കാണാരൂന്റെ കയ്യില്‍ ചുരുണ്ടു കിടന്നു,ഓനൊരു ദീര്‍ഘനിശ്വാസം വിട്ടു എന്നെ നോക്കി
ഞാന്‍ വിളറിപ്പോയിരുന്നു,ഓന്റെ മഞ്ഞക്കണ്ണുകളില്‍ വിജയത്തിന്റെ മിന്നല്‍ കതിരുകള്‍ തെളിഞ്ഞു.
ഏട്ന്നാ മോനേ ഞ്ഞി ഇബ്ബലൂണ് വാങ്ങീത്‌? മോയിക്കാന്റെ പീട്യേന്നാ?ന്റെ വാക്കുകളില്‍ അത്ഭുതവും ഭീതിയും കലര്‍ന്നിരുന്നു.
കണാരു ചിരിച്ചു, പൊട്ടിപ്പൊട്ടിച്ചിരിച്ചു,മൂക്കോണ്ടാ ഓന്‍ ചിരിക്യാ ചിരിക്കൊപ്പം പത്തിവിടര്‍ത്താത്ത രണ്ടു പാമ്പിന്‍ കുഞ്ഞുങ്ങള്‍ മൂക്കിന്‍ തുളയില്‍ നിന്നു പുറത്തു ചാടും ചിരിക്കൊടുവില്‍ അവ മാളങ്ങളില്‍ വിശ്രമിക്കും.
ബടുക്കൂസെ ഇബ്ബലൂണ് മോയിക്കാന്റെ പീട്യേലൊന്നും കിട്ടൂല,ഞ്ഞി തലകുത്തി നിന്നാലും കിട്ടൂല.കള്ളപ്പന്നി ബീര്യം കൂട്ട്വാണ്.
ഞ്ഞി പൊന്തി കാട്ടണ്ടാ ഞ്ഞിട്ടു പറയ്യെം വേണ്ട. ഞാന്‍ കെറുവിച്ചു.
അതോനു സഹിക്കൂല,ഓന്റെ കണ്ണിലെ തിരി കെട്ടു.
ഒണക്കമത്തീന്റെ വാടയ്ക്കൊപ്പം ആ രഹസ്യം എന്റെ കാതിലെത്തി
ഇനിക്കിത് അണ്ടീക്കണ്ണച്ചന്റെ വൃത്തിക്കമാവിന്റെ ചോട്ടീന്നു കിട്ടീതാ,മാപ്ലാര് സുന്നത്തു കയ്ച്ചാലിടുന്നതാണു പോലും,കുട്ട്യോക്കറു പറഞ്ഞതാ!അനക്കു ബേണോ? കൊറേയുണ്ട്.ഒറ്റശ്വാസത്തില്‍ എല്ലാം പറഞ്ഞു കണാരു കിതച്ചു.
നിധിവേട്ടയ്ക്കിറങ്ങിയ കടല്‍ക്കൊള്ളക്കാരെപ്പോലെ രണ്ടു കുട്ടിച്ചെകുത്താന്മാര്‍ അണ്ടിക്കണ്ണച്ചന്റെ വൃത്തിക്കമാവിന്‍ തോട്ടം അരിച്ചു പെറുക്കി,ടീച്ചറമ്മയുടെ വീടിന്റെ എറയില്‍ പകലു മുഴുവന്‍ ബലൂണുകള്‍ നൃത്തം ചെയ്തു.
രാത്രി വള്ളിത്തണ്ടുകള്‍ ചിതറിക്കിടന്ന തറയില്‍ തിണര്‍ത്ത തുടയുമായി ടീച്ചറമ്മേന്റെ തലതെറിച്ച സന്തതി കിടന്നു.നിശീഥിനിയുടെ ഏഴാം യാമത്തില്‍ മോന്തായത്തിലൂടെ പല്ലികള്‍ വെകിളി പിടിച്ചു പാഞ്ഞു.ടീച്ചറമ്മേടെ മോന്‍ പരശതം ബലൂണുകള്‍ക്കൊപ്പം ഉയര്‍ന്നു പൊങ്ങുന്ന കാഴ്ച കണ്ട് അവ നിറ്ത്താതെ ചിലച്ചു,കണാരുവിന്റെ രൂക്ഷമായ നോട്ടത്തില്‍ പല്ലികള്‍ നിശ്ശബ്ദരായി
അവസാനിക്കുന്നില്ല........

കുഞ്ഞിപ്രാവും കുഞ്ഞനുറുമ്പും(മിനിക്കഥ)

2008-01-01T21:04:00.000+05:30

ഒരു ദിവസം കുഞ്ഞനുറുമ്പ് വെള്ളം കുടിക്കുമ്പോള്‍ കാല്‍ വഴുതി
നദിയില്‍ വീണു.വെള്ളത്തില്‍ മുങ്ങിയും പൊങ്ങിയും വെള്ളം
കുടിച്ചും അവന്‍ നിലവിളിച്ചു.”രക്ഷിക്കണേ! രക്ഷിക്കണേ!”.
തൊട്ടടുത്ത മരക്കൊമ്പിലിരുന്ന കുഞ്ഞിപ്രാവ്‌ ഇതു കേട്ടു.’പാവം
കുഞ്ഞനുറുമ്പ് ഇപ്പോള്‍ മുങ്ങിച്ചാവും. അവനെ രക്ഷിക്കണം’.
അവള്‍ വിചാരിച്ചു.കുഞ്ഞിപ്രാവ് മരത്തിന്റെ ഇല കൊത്തിയെടുത്ത്‌
ഉറുമ്പിനടുത്തു തന്നെ ഇട്ടു കൊടുത്തു.കുഞ്ഞനുറുമ്പ് പണിപ്പെട്ട്
അതില്‍ പിടിച്ചു കയറി.”ഹൊ! രക്ഷപ്പെട്ടു.നന്ദി കുഞ്ഞിപ്രാവേ,
എന്നെങ്കിലുമൊരിക്കല്‍ എനിക്കും നിന്നെ സഹായിക്കാന്‍
കഴിഞ്ഞേക്കും.”കുഞ്ഞനുറുമ്പിന്റെ കണ്ണുകള്‍ കൃതജ്ഞത
കൊണ്ട് നിറഞ്ഞു.

കാലം കുറച്ചു കഴിഞ്ഞു. ഒരു ദിവസം കുഞ്ഞിപ്രാവ്‌ ഇല-
ച്ചാര്‍ത്തുകള്‍ക്കിടയില്‍ തന്റെ ഇണയുടെ ചിറകിനുള്ളില്‍
മുഖം പൂഴ്ത്തി മനോരാജ്യത്തില്‍ ലയിച്ചിരിക്കുകയായിരുന്നു.
അടിവയറ്റിലൂടേ ഒരു തണുപ്പ് അരിച്ചിറങ്ങയിപ്പോള്‍ കുഞ്ഞി-
പ്രാവു കണ്ണു തുറന്നു.ഒരു ചോരത്തുണ്ട് ഇലകൊഴിയുന്നതു
പോലെ താഴോട്ടു വീഴുന്നതും.മഴവില്ലു ചുണ്ടില്‍ കോര്‍ത്ത
ഒരരിപ്രാവ്‌ ചിറകടിക്കാതെ മുകളിലേക്കു ചരിക്കുന്നതും
അവള്‍ കണ്ടു.ഊറിയുറഞ്ഞ കണ്ണീര്‍ നിലത്തു വീഴും മുമ്പെ
തളിര്‍ത്ത മരത്തിനു വീണ്ടും മൃത്യുവിന്റെ തിളക്കം.
ജീവന്റെ അവസാനത്തെ പിടച്ചിലിനിടയില്‍,കുഞ്ഞി-
പ്രാവ് തലയുയര്‍ത്തി,വേട്ടക്കാരന്റെ പിന്നില്‍ കുഞ്ഞനുറുമ്പ്
ചിരിക്കുന്നു,കൃതജ്ഞതയുടെ ചിരി.

മൌനം

2007-12-30T06:49:00.000+05:30

മൌനം എനിക്കും നിനക്കും ഇടയില്‍
ഒരു വേട്ടാളന്‍ കൂടു കെട്ടുന്നു.
മണ്‍പുറ്റിനുള്ളില്‍
പുഴുക്കള്‍ പുളയ്ക്കുന്നു
മൌനം നീയെന്നെ മറന്നോ
എന്ന ചോദ്യത്തിനുള്ള
മറു ചോദ്യമാണു!!
വാക്കിന്റെ വരിയുടച്ച
മൌനത്തില്‍
ഓര്‍മ്മയുടെ കടലിരമ്പം

പുളിക്കുന്ന മുന്തിരിക്കുലകളും
മുതലച്ചിരികളും വെടിഞ്ഞ്‌
നമ്മളൊരുമിച്ചുകാശിക്കു പോയി
തിരക്കഥ തെറ്റിച്ച്‌കാറ്റുംമഴയും
ഒരുമിച്ചു വന്നു
നെഞ്ചകത്തു നഞ്ഞു കലങ്ങുമ്പോള്‍
തന്തയുടെ മെലോഡ്രാമ
പേറ്റുനോവിനു വില പറഞ്ഞ
മാതൃത്വത്തിന്റെ ഗദ്ഗദം
അറുത്തെടുത്ത മോതിരവിരല്‍
മൌനത്തില്‍ പൊതിഞ്ഞ്‌
അവര്‍ക്കുള്ള ദക്ഷിണ

കാക്കയേയും പരുന്തിനേംപേടിച്ച്‌
ചിറകിലൊളിപ്പിച്ചത്‌പറക്കമുറ്റി
പറന്നു പോയപ്പോള്‍

പ്രണയത്തിനു പീണ്ഡം വച്ചു.
ബലിക്കാക്കകളെ ഊട്ടുമ്പോള്‍

കണ്ണില്‍ ഉപ്പുതടാകങ്ങള്‍
പൊട്ടിയൊലിച്ചപ്പോള്‍

ഓര്‍മ്മയുടെ കണ്ണു കുത്തിപ്പൊട്ടിച്ചു
അന്ധത വരിച്ചപ്പോള്‍
നമുക്കു കൂട്ട് മൌനം

പദ്രേക്കു മാത്രം

2007-12-28T14:36:00.000+05:30

വേലികള്‍ കളകള്‍ക്കു
കാവലാളാകുമ്പോള്‍
“പദ്രേ”
വിതയ്ക്കും വിളവിനുമിടയില്‍
നീ പച്ചയോടെ വളമാകുന്നു.

എന്റെ നെടുവീര്‍പ്പിനും
വിമ്മിട്ടത്തിനുമിടയിലൂടെ
നീ മുടന്തി മുടന്തി നടക്കുന്നു

പടികളടര്‍ന്നുമാറിയ
പിരിയന്‍ കോണിയും പേറി
നിന്റെ നിശ്ചല വായുവില്‍
കൂടുവിട്ടു കൂടുമാറുന്ന
ആത്മാവുകള്‍
തിരശ്ചീനമായും ലംബമായും
ചരിക്കുന്നു

വിണ്ടുകീറിയ നെഞ്ചില്‍
പിറവിക്കു മുന്‍പെ
പിള്ളത്തണ്ടു മുറിഞ്ഞ
കുഞ്ഞുമുഖങ്ങള്‍ തേങ്ങുന്നു

ഇല കൊഴിയും പോലെ
നിന്റെ പീലികള്‍ കൊഴിഞ്ഞു
ഋതുഭേദങ്ങളിലെവിടെ വച്ചാണ്
നിനക്കു വസന്തം നഷ്ടമായത്‌?

മൂക്കിന്‍ തുമ്പത്തെ ഈച്ചയും
മൂര്‍ച്ചയുള്ള വാളും
പൊട്ടന്‍ രാജാവും
ഭക്തന്‍ അംഗരക്ഷകനും
ചേര്‍ത്ത്‌
കുളക്കരയിലും കുന്നിന്‍ പുറത്തും
തേയിലക്കൊതുകുകള്‍
ഇല്ലാക്കഥ പറഞ്ഞു പരത്തിയത്‌
നീയറിഞ്ഞുവോ?

കണ്ണുകെട്ടി കുരുടരായ
രാജാക്കന്മാരെ മറന്നേക്കുക
കണ്ണുകള്‍ പിഴുതെടുത്ത
ചതുരപ്പെട്ടിയേയും.

ഉള്ളും ഉടലും ഉരുകി
മറ്റൊരു “ചെര്‍ണോബ്”
ആവുക
ഒരു പൊട്ടിത്തെറിയില്‍
എല്ലാം തീര്‍ക്കുക.

അല്ലെങ്കില്‍
നീ തരിക
ഒരു ഭൂതക്കണ്ണാടി
ചരിത്രത്തിന്റെ കൈ രേഖയില്‍
നിന്റെ ദേഹം തിരയാന്‍.

(ചില്ഡ് ബീറിനൊപ്പം കശുവണ്ടി
കൊറിക്കുമ്പോള്‍
മുത്തക്കഷെട്ടിയോ ബോള്‍വിക്കാനം
സുജിത്തോ
നിങ്ങള്‍ക്കു മുന്നില്‍
പ്രത്യക്ഷപ്പെടാം
കഫനൂലുകളുടെ കുറുകല്‍
പഴുപ്പിന്റെ,ചലത്തിന്റെ
അമ്ലഗന്ധം
നിങ്ങളെ ശല്യപ്പെടുത്താം
ഒരു ഓക്കാനം
അവര്‍ക്കായി
കരുതി വയ്ക്കുക)

****“പദ്രേ“ എന്‍ഡോസള്‍ഫാന്റെ ദുരിതം പേറുന്ന കസര്‍ഗോടു ജില്ലയിലെ ഒരു ഗ്രാമം

ദമനം

2007-12-25T06:27:00.001+05:30

അതിസുന്ദരിയായ പെണ്‍ കുട്ടി പുഴക്കരെ നില്‍ക്കുന്നു.ഭാനുമാന്‍ അസ്തമിച്ചു തുടങ്ങിയിരിക്കുന്നു.കുട്ടി ഭയന്നിരിക്കുന്നു. അപ്പോഴാണ് സന്യാസി മ്ഠത്തിലേക്കു തിരിക്കുന്ന ഒരു വൃ ദ്ധ സന്യാസി അതു വഴി വന്നത്. അയാള്‍ പെന്‍ കുട്ടിയെ നോക്കി, കാരണം ഒരു പെണ്‍കുട്ടിയെ നഷ്ടപ്പെടുകയെന്നതോ നോക്കാതിരിക്കുകയെന്നതോ ഒരു സന്‍യ്യാസിയെ സംബന്ധിച്ചിടത്തോളം അതി കഠിനമാണ് ഒരു പെണ്‍കുട്ടി ഒഴിയാ ബാധയാകുകയെന്നതും ഒരു സന്യാസിയെ സംബ്ന്ധിച്ച്‌ അതി കഠിനമാണ്.! അയാള്‍ ശക്തിയായി പ്രതിരോധിച്ചു കാരണം സ്ത്രീയില്‍ ശത്രു അടങ്ങിയിരിക്കുന്നു എന്നയാള്‍ക്ക്‌ ഉറച്ച ബോധ്യമുണ്ട്‌.
നിങ്ങള്‍ക്കു മിത്രത്തെ ഉപെക്ഷിക്കാം, ശത്രുവിനെ പറ്റില്ല-നിങ്ങളയാളെ കണ്ടേ പറ്റൂ നിങ്ങള്‍ തെരുവിലൂടെ നടക്കുമ്പോള്‍ അവിടെ ശത്രുവുണ്ടെങ്കില്‍ അയാളെ കാണാതിരിക്കുക അസാദ്ധ്യമാണ് അവരവിടെ ഉണ്ടെന്ന ബോധമില്ലാതെ മിത്രങ്ങള്‍ കടന്നു പോയേക്കാം.ശത്രുക്കള്‍ക്കു പറ്റില്ല-കാരണം ശത്രു ഭയമാണ്.ഒരു സുന്ദരിയായ സ്ത്രീ തനിച്ചു നില്‍ക്കുന്നു,മറ്റാരുമില്ല! അവള്‍ ആരുടെയെങ്കിലും സഹായം ആവശ്യപ്പെടുന്നുണ്ട്‌-പുഴയെക്കുറിച്ച്‌ അവല്‍ അജ്ഞയും,അതു കടക്കാന്‍ അവള്‍ക്കു ഭയവുമാണ്.
ഈ വൃദ്ധസന്യാസി അയാളുടെ മിഴിയടക്കാന്‍ ശ്രമിക്കുന്നുണ്ട്‌,ഹൃദയമടയ്ക്കാന്‍ ശ്രമിക്കുന്നുണ്ട്‌,രതികേന്ദ്രമടയ്ക്കാന്‍ ശ്രമിക്കുന്നുണ്ട്‌.കാരണം അതൊന്നു മാത്രമാണ് ശത്രുവില്‍ നിന്നുള്ള സംരക്ഷണം അയാള്‍ ധൃതിപ്പെടേണ്ടതുണ്ട്‌, പിന്തിരിഞ്ഞു നോട്ടത്തെ ഒഴിവാക്കെണ്ടതുണ്ട്‌ പക്ഷെ......

ദമനം(തുടര്‍ച്ച)

2007-12-25T05:38:00.000+05:30

അയാളുടെ മനം നിറയെ ആ പെണ്‍കുട്ടിയാണ്.അയാളുടെ നിലനില്പു മുഴുവന്‍ അവള്‍ക്കു ചുറ്റുമാണ്.അയാള്‍ പുഴ കടക്കുകയാണ് പക്ഷെ പുഴയെ കുറിച്ചയാള്‍ ബോധവാനല്ല.അയാളില്ല .അയാള്‍ സന്യാസിമഠത്തിലേക്കു പോവുക തന്നെയാണ് പക്ഷെ അയാള്‍ക്കിപ്പോള്‍ സന്യാസിമഠത്തില്‍ താല്പര്യമില്ല മുഴുവന്‍ താല്പര്യവും പിറകില്‍ ഉപേക്ഷിക്കപ്പെട്ടിരിക്കുന്നു പെട്ടന്നയാള്‍ തന്റെ സഹചാരിയെ ഓര്‍ക്കുന്നു,ഒരു യുവസന്യാസി,അവര്‍ ഭിക്ഷാടനത്തിലായിരുന്നു, അയാള്‍ തിരിഞ്ഞു നോക്കി അവിടെ യുവസന്യാസി തനിച്ചല്ല അയാളുടെ തോളത്ത്‌ ആ പെണ്‍ കുട്ടിയുമുണ്ടായിരുന്നു!
ഇതു വൃദ്ധനില്‍ ആഴമേറിയ അസൂയ ഉളവാക്കി, ഇതയാള്‍ ചെയ്യാന്‍ ആഗ്രഹിച്ചതായിരുന്നു.നിയമം കാരണം ചെയ്തില്ലെന്നേയുള്ളൂ‍.അവര്‍ മൈലുകളോളം നിശ്ശ്ബ്ദരായി നടന്നു. പെട്ടെന്ന് സന്യസിമഠം വാതില്‍ക്കല്‍ വച്ച്‌ വൃദ്ധന്‍ പറഞ്ഞു”ഇതു നന്നായില്ല ഇതു നിയമ വിരുദ്ധമാണ്”
ആ നിശ്ശബ്ദത മിഥ്യയായിരുന്നു. മൈലുകളോളം ആ വൃദ്ധന്‍ ചിന്തിച്ചത്‌ എങ്ങനെ പക വീടാമെന്നായിരുന്നു.എങ്ങനെ ആ യുവാവിനെ കുറ്റവാളിയാക്കാമെന്നായിരുന്നു അയാള്‍ തുടര്‍ച്ചയായി പീഢിപ്പിക്കപ്പെട്ടിരുന്നു;മറ്റൊരു വിധത്തില്‍,പെട്ടെന്നൊന്നും സംഭവിച്ചില്ല.മനസ്സ്‌ ഒരു നൈരന്തര്യമാണ് ഈ രണ്ടോ മൂന്നോ മൈലുകളോളം അയാള്‍ എന്തു ചെയ്യണമെന്നു തുടര്‍ച്ചയായി ചിന്തിക്കുകയായിരുന്നു, ഇപ്പോള്‍ മാത്രം പറഞ്ഞു എന്നേയുള്ളൂ.
ഇതു ആകസ്മികമല്ല ഉള്ളില്‍ ഒരു പ്രവാഹമുണ്ടായിരുന്നു. അയാള്‍ പറയുന്നു” ഇതു നന്നല്ല,നിയമ വിരുദ്ധമാണ് ഞാനിതു മഠാധിപതിയെ അറിയിക്കാന്‍ പോവുകയാണ്.നീയൊരു നിയമം ലംഘിച്ചിരിക്കുകയാണ്‌ ഒരു സ്ത്രീയെ സ്പര്‍ശിക്കരുത്‌ എന്ന അടിസ്ഥാന നിയമം.നീയവളെ തൊടുക മാത്രമല്ല അവളെ തോളിലേറ്റുകയും ചെയ്തിരിക്കുന്നു” യുവസന്യാസി അമ്പരന്നു.തികച്ചും ആകസ്മികം.... കാരണം അവിടെ ഇപ്പോള്‍ പെണ്‍ കുട്ടിയില്ല,പുഴയില്ല,അവളെയാരും ചുമന്നിട്ടില്ല. മുഴുവന്‍ കാര്യങ്ങളും ഭൂതകാലത്തില്‍ സംഭവിച്ചതാണ്‌. മൂന്നു മൈലുകളോളം അവര്‍ പൂര്‍ണ്ണ നിശ്ശബ്ദരായിരുന്നു.യുവസന്യാസി പറഞ്ഞു” ഞാനവളെ പുഴക്കരയിലുപേക്ഷിച്ചു,നിങ്ങളിപ്പോളും അവളെ വഹിക്കുന്നു”.
ഓഷോ(My way:The way of white clouds,
Chapter 6)

എന്‍ സെവെന്റി

2007-11-25T20:07:00.000+05:30

എന്‍ സെവന്റി,

നിന്റെ ഓറഞ്ച്‌,ലൈലാക്‌
മാംസവര്‍ണ്ണങ്ങളില്‍
യജമാനന്റെ നീണ്ടു കൂര്‍ത്ത
വിരലുകളുടെ ദേശാടനം.
രോമക്കുത്തുകളില്‍ ചുണ്ട്‌ ചേര്‍ത്ത്‌
നീ കൊഞ്ചുന്നു
തലയിണകള്‍ക്കും രാവാടകള്‍ക്കും
നിന്റെ മണം.

ഞങ്ങളുടെ
ടോം ആന്റ്‌ ജെറി കളികള്‍ക്കിടയില്‍
നീ എന്തിനു വന്നു?
അറിയാം
നിന്റെ ഹൃദയത്തിന്റെ അറകള്‍
പ്രണയത്തിന്റെ
തമോഗര്‍ത്തങ്ങള്‍
ഞാന്‍ പോറ്റുവാനൊരു
പൈക്കുട്ടി മാത്രം

നിന്റെ കുറുനാക്കിന്റെ കുറുകലുകളില്‍
വെളുത്ത്‌
നീ തിരക്കിലാകുമ്പോള്‍ കറുത്ത്‌
നിന്റെ അസാന്നിധ്യത്തില്‍
ചുവന്ന്‌
എന്റെ കാന്തന്‍

പിന്നെ വിളിക്കാം എന്ന
ഒരിക്കലും സഫലമാകാത്ത
വഗ്ദാനത്തിന്റെ പഴമൊഴി
എനിക്കു സ്വന്തം

പ്രിയ എന്‍ സെവെന്റി
നിന്നെ ഞാന്‍ സ്നേഹിച്ചു പോകുന്നു
അതിയാന്റെ ആത്മാവറിയുന്ന
ഒരേയൊരാള്‍ നീയാണല്ലോ!

(ഡീറ്റയില്‍ ബില്ലുകള്‍ ആവശ്യപ്പെടാതിരിക്കുക!!!!!)

മിയാത്ത എന്ന പശു (മിനിക്കഥ)

2007-11-22T06:24:00.000+05:30

കുമ്പസാരക്കൂട്ടില്‍“മിയാത്ത“വിയര്‍ത്തു,പിന്നെ തണുത്തുവെറുങ്ങലിച്ചു.വിശുദ്ധ ന്യാധിപന്റെ കൊട്ടുവടി ഉയര്‍ന്നു താണു അവസാനമായി എന്തെങ്കിലും?അവര്‍ എന്നെ....മിയാത്തയുടെ ഓര്‍മ്മയുടെ ഞരമ്പു മുറിഞ്ഞു.മാന്യന്മാരെ അവഹേളിക്കരുത്‌!!!!!സാക്ഷികളുണ്ടോ?അങ്ങുന്നെ,സാക്ഷികളാകാന്‍ആര്‍ക്കും ക്ഷമയില്ലായിരുന്നു. .ശ്രോതാക്കളുടെ ബാഹ്യ കര്‍ണ്ണങ്ങളില്‍ ഇലയനക്കങ്ങള്‍ തീര്‍ത്ത്‌ ശബ്ദവീചികള്‍ അടങ്ങി.ശേഷംമുരള്‍ച്ച,അമറല്‍ നിറം പിടിപ്പിച്ച പൂച്ചിരി, മുളചീന്തല്‍, കരച്ചിലിന്റെ
കോറസ്സ്‌ .തീര്‍ന്നു.

2007-11-09T20:28:00.000+05:30

നിങ്ങള്‍ വായിക്കപ്പെടണമെങ്കില്‍.?.......

നാഥൂറാമിന്റേത്‌ ദയാവധം,
ബുദ്ധന്‍ ഷണ്ഡനായിരുന്നു,
മറിയം ക്രിസ്തുവിന്റെ
വെപ്പാട്ടിയായിരുന്നു,
എന്നിങ്ങനെ സമര്‍ത്ഥിക്കുക

നിങ്ങള്‍ വായിക്കപ്പെടണമെങ്കില്‍?........

പ്രണയച്ചതുപ്പിനു ചുറ്റും
വേലി കെട്ടി
ഭ്രമത്തിനും ഭ്രാന്തിനുമിടയിലുള്ള-
അകലത്തെ
വട്ടത്തിലും നീളത്തിലുമളക്കുക
നിങ്ങള്‍ വായിക്കപ്പെടണമെങ്കില്‍?......
മുലക്കണ്ണുകളുടെ ആസക്തിയെ,
പൊക്കിള്‍ച്ചുഴിയാം ബര്‍മുഡ ട്രയാംഗിളിനെ,
കൃസരിയുടെ ഉദ്ധാരണത്തെ
ജി-സ്പോട്ട് എന്ന മാന്ത്രിക ബിന്ദുവിനെ
യോനീമാഹാത്മ്യങ്ങളെ-
പറ്റി
ഒന്നരപ്പേജില്‍ കവിയാതെ ഉപന്യസിക്കുക
നിങ്ങള്‍ വായിക്കപ്പെടണമെങ്കില്‍..........
ടെക്സാസിലോ, പിലാഡല്‍ഫിയയിലോ
ഇരുന്നോ കിടന്നോ
ചത്തുപോയ
രാമകൃഷ്ണനെന്ന പൂച്ചയേയോ
ശാര്‍ങ്ധരനെന്ന നായയെയോ
ഓര്‍ത്ത്‌
“മലയാലത്തില്‍”ഉറക്കെ നിലവിളിക്കുക
നിങ്ങള്‍ വായിക്കപ്പെടണമെങ്കില്‍.......
പുരുഷാരത്തിനു മുന്‍പില്‍
വിവസ്ത്രനാവുക
അമ്മ പെഴച്ചു പോയെന്നും
പെങ്ങളെ കൂട്ടിക്കൊടുത്തെന്നും
പെണ്ണൊരുത്തി
ജാരനൊപ്പം ഓടിപ്പോയെന്നും
കുമ്പസരിക്കുക

നിങ്ങളെ വായിക്കപ്പെടണമെങ്കില്‍?..........

പാപ്പിറസ്സിന്റെ
പൂമുഖത്തെ
യാങ്കി ദൈവത്തിനു മുത്തം കൊടുത്ത്‌
ചതുര ക്ഷേത്രത്തിലെ
യുദ്ധ കാണ്ഡങ്ങള്‍കണ്ണില്‍ നിറച്ച്‌
കോട്ടുവായിട്ട്‌
“ഹാ പുഷ്പമേ” എന്ന് മന്ത്രിച്ച്‌
കഴിയുമെങ്കി
ല്‍ഒരു വിലാപ കാവ്യം രചിക്കുക
നിങ്ങള്‍ വായിക്കപ്പെടണമെങ്കില്‍......
അന്നത്തെ ഓണം,
പണ്ടത്തെ സംക്രാന്തി,
അന്‍പത്തഞ്ചിലെ വെള്ളപ്പൊക്കം,
ചാവ്‌,
പതിനാറടിയന്തിരം,
പുലകുളി,
ഇത്യാദി സംഭവങ്ങളെ,
അയവെട്ടിക്കൊണ്ടിരിക്കുക.
മെലിഞ്ഞ പുഴയെ കുറിച്ച്‌,
പെയ്തൊഴിഞ്ഞ മഴയെക്കുറിച്ച്‌,
നിലാവിനെയും നിഴലിനെയും-
കുറിച്ച്‌
വാചാലനാവുക.
ഒന്നിനും പറ്റിയില്ലെങ്കില്‍?
........പുരസ്കാരങ്ങളെപ്പറ്റി
പൊലയാട്ടു പറയുക

നിങ്ങള്‍
വായിക്കപ്പെടണമെങ്കില്‍.?.......................................
.......................................
..........................................

യാത്ര

2007-11-04T19:47:00.000+05:30

അവള്‍ പടിഞ്ഞാട്ടും
ഞാന്‍ കിഴക്കോട്ടും
തിരക്കിട്ടു നടക്കുന്നതിനിടയില്‍
കണ്ടു.....
പൂവും പുന്നാരവും ചോദിച്ചില്ല
നമുക്കൊരുമിച്ച്‌?
ആ‍യിക്കോട്ടെ.
ഒരു ചോദ്യത്തിന്
ഒരുത്തരം മാത്രം
ഇരുവരും തെക്കോട്ടു
നടന്ന് തുടങ്ങി.

കുഞ്ഞാട്‌

2007-10-20T15:13:00.000+05:30

പ്രണയത്തിനു സംഭവിക്കുന്നതു

2007-10-13T09:56:00.000+05:30

ഒരേ താളത്തില്‍
ഒരു ഗീതമാലപിക്കാന്‍
ഇനി നമുക്കാവില്ല
ഒരേ ഭാവത്തില്‍ സാഗരം കാണാന്‍
സായന്തനങ്ങള്‍ പിറക്കില്ല
വാക്കുകള്‍ കലപിലകൂട്ടുന്ന
പ്രഭാതങ്ങള്‍ ഒരിക്കലും മടങ്ങി വരില്ല
ഇന്നലെ
ജീവിതത്തിന്റെ
പിന്നാമ്പുറത്ത്‌
ആള്‍ക്കൂട്ടത്തിനു നടുവില്‍
നമ്മള്‍
ആത്മഹത്യ ചെയ്തല്ലോ?!!
പ്രണയം?
അതെല്ലാം മറന്നേക്കൂ
നീയോ ഞാനോ യജമാനന്‍
എന്നുമാത്രം പറയുക.

2007-10-09T18:43:00.000+05:30

ചില പ്രണയ സല്ലാപങ്ങള്‍
കാമുകന്‍: പ്രിയപ്പെട്ടവളേ നീ
കടലിലേക്ക്‌ ഒഴുകി മരിക്കുന്ന പുഴ
കാമുകി:ഫ... പൊലയാട്ടു പറയരുത്‌
നിന്റെ പ്രണയം കുഴിനഖത്തിനുള്ളിലെ
"കുത്തിപ്പറി" മാത്രം
കാമുകന്‍: സ്നേഹത്തിനു അതിര്‍ വരമ്പുകളില്ല
കാമുകി:സ്നേഹിക്കുന്നവര്‍ക്കോ?
കാമുകന്‍:(ഉത്തരം മുട്ടുന്നു,കൊഞ്ഞനം കുത്തുന്നു)
നാം വര്‍ഷം പ്രതീക്ഷിക്കുന്ന
വേഴാമ്പലുകള്‍
ചലിക്കുന്ന പായല്‍ തുരുത്തുകള്‍
ഒറ്റക്കാലില്‍
തപസ്സിരിക്കുന്ന വെള്ളക്കൊക്കുകള്‍
കാമുകി:അല്ല.. അല്ല...അല്ല (അലര്‍ച്ച)
നീ നടുക്കടലില്‍ ഒറ്റപ്പെട്ട ശുനകന്‍.
വിളിച്ചുണര്‍ത്തി
അന്നമില്ലെന്നു പരിഹസിച്ചവന്‍
കാമുകന്‍:കാറ്റാടി മരത്തണലും
കടല്‍ക്കരയിലെ ഉപ്പുകാറ്റും
കുന്നിന്‍ ചെരിവിലെ വിജനതയും
നമുക്കായി മാത്രമുള്ള നാലു ചുവരുകളും
എന്റെ പ്രണയത്തിനന്യം
കാമുകി:(ചീറുന്നു)
ഭേഷ്‌... ഭേഷ്‌ ഭേഷ്‌....
ഞാന്‍ ആത്മാവാകുന്നു
എന്റെ ചോര വറ്റുന്നു
മാംസത്തുണ്ടുകള്‍ കരിയുന്നു
ഗര്‍ഭപാത്രത്തില്‍ വിരകള്‍ പെറ്റു പെരുകുന്നു
(അവര്‍ അങ്ങനെയാണ് സജാതീയ ധ്രുവങ്ങള്‍, പ്രണയം സമാന്തര രേഖകളില്‍ നിന്നുള്ള ഇലക്ട്രിക്‌
ഡിസ്ചാര്‍ജ്ജ്‌ മാത്രം)

പ്രണയിനീക്ക്‌

2007-08-14T18:36:00.001+05:30

നിന്നിലേക്കെത്താന്‍ മൂന്നു വഴികള്‍
ക്ലാവു പിടിച്ച ഒര്‍മ്മകളുടെ
ശവപ്പറമ്പിലൂടെ
പിന്നോട്ടൊരു യാത്ര
ബ്രൂട്ടസ്സിനും കാഷ്യസ്സിനും
ഇടയിലൂടെ
മാര്‍ജ്ജാരഗമനം
പിന്നെ
മൂന്നക്ഷരമുള്ള
ഒരു കുറുക്കു വഴി

2007-08-14T15:01:00.000+05:30

ഇതൊരു കടങ്കഥയാണ്………..ഉത്തരം കണ്ടെത്താമോ?

എട്ടുകാലി താങ്ങുന്ന മോന്തായം
ചാപിള്ളകളെ പെറ്റുകൂട്ടുന്ന
പെരുത്ത വയറുമായി
അലമാരപ്പെണ്ണുങ്ങള്‍
പിന്നോട്ടു തിരിയുന്ന ഘടികാരം
ചുവപ്പു നിറമുള്ള പട്ടിയുടെ വാല്
ഇരിപ്പിടങ്ങളില്‍ അര്‍ശസ്സിന്റെ
ചുവന്ന വട്ടങ്ങള്‍
ചിലയ്ക്കുന്ന പല്ലിപ്രമാണികള്‍
നുണച്ചിക്കാറ്റിന്റെ ഹുങ്കാരം
ചൊറിച്ചുമല്ലലിന്റെ
പച്ചച്ചിരികള്‍
ചത്തകണ്ണുകള്‍
തളര്‍വാതം പിടിച്ച കൈകള്‍‌
ശ്മശാനത്തിന്റെ ഗന്ധം
വാറ് അറ്റുപോയ ചെരുപ്പിന്റെ കുന്നുകള്‍
മൂകസാക്ഷിയായ പല്ലു പോയ വൃദ്ധന്‍
മണിലാല്‍

2007-08-14T14:57:00.000+05:30

കണ്ണാടിയില്‍ പുലരിയില്‍
പന്നിയുടെ മുഖമുള്ള കഴുത
മധ്യഹ്നത്തില്‍
കാണ്ടാമൃഗത്തിന്റെ തേറ്റകള്‍
ത്രിസന്ധ്യയ്ക്ക്‌
ഉടഞ്ഞു ചിതറിയ ചില്ലിന്‍ തുണ്ടുകള്‍.........
ചേര്‍ത്തുവച്ചപ്പോള്‍
ദ്രംഷ്ട്രകളില്‍ നിന്ന്‌ രക്ത്തമിറ്റുന്ന
നൂറു ചെന്നായകള്‍
ഓ…. അതു കണ്ണാടിയല്ലായിരുന്നു
എനിക്കും നിനക്കുമിടയില്‍
നില കൊണ്ട സുതര്യമായ
ചില്ലിന്‍ കഷ്ണം മാത്രം
മണിലാല്